Senatorja amerikane Ernst në Prishtinë: takime me Kurtin dhe komandantin e FSK-së

Senatorja amerikane e shtetit të Ajovës, Joni K. Ernst, u prit në Prishtinë nga komandanti i Forcës së Sigurisë së Kosovës (FSK), Gjenerallejtënant Bashkim Jashari, në një takim të fokusuar te forcimi i bashkëpunimit ushtarak mes Kosovës dhe Shteteve të Bashkuara.

Ernst ishte e shoqëruar nga e ngarkuara me punë në Ambasadën e SHBA-së në Prishtinë, Anu Prattipati, dhe nga Agjutanti i përgjithshëm i Ajovës, Gjeneral Major Stephen Osborn.

Sipas njoftimit, Jashari e falënderoi senatoren për vizitën dhe për mbështetjen e vazhdueshme të SHBA-së ndaj Republikës së Kosovës dhe FSK-së. Bisedimet u përqendruan te zhvillimet aktuale, e ardhmja dhe prioritetet e FSK-së, si dhe te bashkëpunimi me Uashingtonin.

"Në takim u diskutua për zhvillimet aktuale dhe të ardhmen e FSK-së, prioritetet e saj, si dhe për rëndësinë e bashkëpunimit të vazhdueshëm me Shtetet e Bashkuara të Amerikës. Po ashtu, u shkëmbyen qëndrime lidhur me zhvillimet aktuale të sigurisë dhe sfidat e përbashkëta", thuhet në njoftim.

Në përfundim, Jashari theksoi rëndësinë e thellimit të partneritetit dhe të marrëdhënieve bilaterale në fushën e mbrojtjes dhe të sigurisë.

Të njëjtën ditë, senatorja Ernst u prit edhe nga kryeministri në detyrë i Kosovës, Albin Kurti. Sipas njoftimit të Zyrës së Kryeministrit, bisedimet përfshinë raportet Kosovë-SHBA, sigurinë dhe zhvillimet politike në vend. Kurti e informoi Ernst për progresin e Kosovës në rritjen ekonomike dhe përmirësimin e situatës së brendshme të sigurisë.

Ndër çështjet e diskutuara ishte edhe e ardhmja e Kampit Bondsteel. Kurti ritheksoi qëndrimin e Qeverisë së Kosovës që baza të shndërrohet në një prani të përhershme ushtarake amerikane, çka sipas tij do të kontribuonte në garantimin e paqes e të sigurisë në Kosovë dhe në rajon, si dhe mund të shërbente si bazë strategjike për operacionet e NATO-s në Evropën Juglindore.

Kurti dhe Ernst diskutuan gjithashtu për situatën politike në Kosovë dhe nevojën për vazhdimin e dialogut ndërmjet partive parlamentare, me synim arritjen e një marrëveshjeje për formimin e institucioneve. Takimi vjen pas një takimi të mëparshëm të tyre në Uashington, në shtator të vitit 2025.