Sejdiu tërhiqet nga gara për president, LVV: Goditje, por zgjedhjet e katërta duhen shmangur

Kandidati që u përmend si shpresa e fundit për të dalë nga bllokada e zgjedhjes së presidentit të Republikës, profesori Bekim Sejdiu, ka tërhequr kandidaturën. Arsyen e shpjegoi vetë: nuk gjeti përkrahjen e nevojshme nga partitë politike.

Sejdiu kishte dalë si figura konsensuale pas marrëveshjes mes Lëvizjes Vetëvendosje dhe LDK-së. Tërheqja e tij shihet si një goditje e re për procesin e zgjedhjes së kreut të shtetit.

Deputeti i Lëvizjes Vetëvendosje, Adnan Rrustemi, tha në një intervistë për Ekonomia Online se partia e tij e respekton vendimin, por e konsideron një shans të humbur. "E kemi parë lajmin për tërheqjen e profesor Bekim Sejdiut si kandidat konsensual për president të Republikës pas marrëveshjes së LVV-së dhe LDK-së. Ai kishte dhënë edhe arsyet e tij publike. Nuk e di se a ka pasur komunikim mesazhesh të tjera, por lexova natyrisht se ai tha që ka njoftuar zotëri Kurtin dhe zotëri Abdixhikun. Ka dhënë arsyet e tij që ndërlidhen me procesin aktual politik edhe me refuzimin e 6 deputetëve të LDK-së për ta zbatuar ose për ta mbështetur marrëveshjen e arritur pas një procesi të vështirë të negociatave mes LDK-së dhe LVV-së. Qëndrimin e tij s’kemi tjetër veçse ta respektojmë, por gjithashtu shprehim keqardhje për një rast ideal të humbur për Kosovën që të kemi një president konsensual, jashtëpartiak, por edhe mbi të gjitha që do t’i jepte fund krizës aktuale politike sa i përket çështjes së presidentit", deklaroi Rrustemi.

Sipas tij, tërheqja e vështirëson procesin, por nuk do të thotë heqje dorë. "Pa asnjë dyshim, tërheqja e zotit Sejdiu mund të shihet si një lloj goditjeje, do të thoja, për këtë procesin e zgjedhjes së presidentit pas kundërshtimit të pabazuar të 6 deputetëve të LDK-së. Natyrisht, ne do të vazhdojmë përpjekjet për të gjetur një president dhe për t’i shmangur zgjedhjet e katërta me radhë, të panevojshme, të kushtueshme, të dëmshme. Por megjithatë mbetet të shihet se si do të zhvillohet procesi politik tash e tutje", u shpreh ai.

I pyetur nëse do të ketë ftesë të re për partitë opozitare për një takim lidhur me presidentin, Rrustemi tha se nuk ka informacione, duke theksuar se Vetëvendosja i ka ftuar vazhdimisht partitë. "Nuk e di, nuk kam informacione, por Lëvizja Vetëvendosje vazhdimisht i ka ftuar të gjitha partitë politike. LDK është përgjigjur, PDK dhe Aleanca jo. Por dua ta përsëris edhe një herë që çështja e presidentit kërkon konsensus dhe askush as nuk duhet, as nuk mundet ta pengojë qeverisjen e stabilitetit institucional duke përdorur si pretekst procesin e zgjedhjes së presidentit që kërkon 2/3 e deputetëve të Kuvendit të Kosovës", tha ai.

Aritmetika e Kuvendit mbetet pengesa kryesore: për zgjedhjen e presidentit nevojiten dy të tretat e deputetëve, shumicë që kërkon mbështetje përtej koalicionit qeverisës. Pa këtë konsensus, alternativa që Vetëvendosja thotë se po përpiqet ta shmangë janë zgjedhjet e katërta me radhë.