Rutte para aktgjykimit të Hagës: KFOR-i mbetet, paqja në Kosovë nuk vihet në diskutim

Pyetjes për rrezikun e trazirave pas vendimit të Hagës, sekretari i Përgjithshëm i përgjithshëm i NATO-s, Mark Rutte, iu përgjigj me një mesazh të shkurtër: asgjë nuk ndryshon. Në një konferencë për media të mbajtur më 14 shtator në selinë e Aleancës në Bruksel, ai tha se përkushtimi i NATO-s për ruajtjen e paqes dhe sigurisë në Kosovë do të mbetet i pandryshuar, pavarësisht aktgjykimit që pritet të shpallet më 16 shtator.

"Kjo vlen edhe sot, pavarësisht se çfarë lajmesh mund të vijnë këtë javë ose në periudhën e ardhshme", deklaroi Rutte, duke theksuar zotimin afatgjatë të Aleancës për paqe dhe siguri në Kosovë.

Sipas tij, KFOR-i, misioni i NATO-s në Kosovë, do të vazhdojë të kontribuojë në stabilitet dhe siguri. Rutte shtoi se Aleanca do ta vlerësojë vazhdimisht përbërjen dhe vendosjen e trupave të KFOR-it, në mënyrë që misioni të përshtatet me situatën e sigurisë.

Më 16 shtator, Dhomat e Specializuara në Hagë pritet të shpallin aktgjykimin ndaj katër ish-krerëve të UÇK-së: Hashim Thaçit, Kadri Veselit, Jakup Krasniqit dhe Rexhep Selimit. Të katër janë deklaruar të pafajshëm për të gjitha pikat e aktakuzës.

Vendimi vjen në një moment kur në Kosovë janë paralajmëruar aktivitete dhe protesta të lidhura me këtë proces gjyqësor.