Rusia godet të tria termocentralet e Kievit, pavarësisht thirrjes së Trumpit për armëpushim

Të tria termocentralet e Kievit u goditën gjatë natës nga ushtria ruse, sipas kryeministrit ukrainas, Serhi Koretsky. Sulmi ra pikërisht mbi sektorin e energjisë, aty ku presidenti amerikan, Donald Trump, kishte kërkuar armëpushim.

Koretsky shkroi se Rusia ka "goditur gjithashtu infrastruktura kritike në rajonin e Kievit, të cilat sigurojnë furnizimin me energji elektrike të kryeqytetit dhe të rajoneve qendrore". Kryebashkiaku i Kievit, Vitali Klitschko, njoftoi se në qytet janë raportuar ndërprerje të energjisë elektrike.

Goditjet nuk u kufizuan te kryeqyteti. Raketa balistike shënjestruan infrastruktura energjetike në rajonin e Harkivit, ndërsa, sipas Koretskyt, infrastruktura hekurudhore u sulmua në pesë rajone të vendit. Nuk ka ende të dhëna për viktima.

Presidenti ukrainas, Volodymyr Zelensky, e cilësoi ngjarjen si "një sulm balistik rus i qëllimshëm kundër sektorit të energjisë, një fushë për të cilën presidenti amerikan kishte bërë thirrje për armëpushim". Ai foli edhe për "një demonstrim përbuzjeje nga ana e Rusisë ndaj Amerikës", të paparë më parë.

Presion nga Uashingtoni

Në të njëjtën kohë, Kievi ndodhet nën trysni nga aleati i tij kryesor. Në një intervistë për një radio amerikane, Zelensky deklaroi se administrata Trump e ka paralajmëruar Ukrainën se mund t'ia ndërpresë qasjen në informacionet e inteligjencës amerikane, nëse vazhdon sulmet në thellësi kundër rafinerive ruse të naftës. "A kemi marrë një mesazh që thotë se kjo mund të ndalet nëse…? Po, gjeneralët e mi e kanë marrë këtë informacion përmes zyrtarëve ushtarakë. (…) Ata morën informacionin se kjo mund të ndalej", tha ai.

Trump, nga ana e tij, pohoi një ditë më parë se Shtetet e Bashkuara vazhdojnë t'i ofrojnë inteligjencë Ukrainës dhe se po punojnë me rusët dhe ukrainasit për t'i dhënë fund luftës.

Megjithatë, Zelensky ka bërë të ditur dy herë, dje dhe gjatë kësaj nate, se Ukraina nuk ka marrë paralajmërim të hershëm për sulmet e ushtrisë ruse. Sipas Politico, të martën Uashingtoni e kishte shpjeguar mungesën e paralajmërimit me kushtet e motit.

Starlink dhe mesazhi i Muskut

Një tjetër shqetësim erdhi nga fusha e komunikimeve. Këshilltari për teknologjinë i presidentit ukrainas, Serhi Beskrestnov, deklaroi këtë mëngjes se funksionimi i disa terminaleve Starlink duket se është kufizuar gjatë natës. "Këtë natë, SpaceX vendosi një kufizim shpejtësie për terminalet Starlink në lëvizje", tha ai, duke shtuar: "Forcat tona të mbrojtjes nuk u njoftuan për këtë kufizim, gjë që çoi në ndërprerjen e disa misioneve. Me sa duket qartë, kjo masë nuk mund të jetë rastësi dhe lidhet me situatën aktuale politike."