Rrustem Mustafa i kërkon Kurtit tryezë me PDK-në: "Çelësi është në duart e tua"

Një ofertë publike për dalje nga ngërçi institucional vjen nga radhët e opozitës. Deputeti i Partisë Demokratike të Kosovës, Rrustem Mustafa, i njohur si Remi, ka propozuar një platformë politike për, siç thotë ai, zhbllokimin institucional të vendit, duke kërkuar një marrëveshje ndërmjet Lëvizjes Vetëvendosje, Partisë Demokratike të Kosovës dhe komuniteteve joshumicë.

Adresimin kryesor Mustafa ia bën kryetarit të Lëvizjes Vetëvendosje. "Kryetar i LVV-së, Albin Kurti, çelësi është në duart e tua", shkruan ai.

Sipas tij, përgjegjësia për nisjen e bisedimeve i takon partisë më të madhe në Kuvend. "Si udhëheqës i forcës më të madhe parlamentare, ke përgjegjësinë për ta hapur këtë tryezë. Ky propozim njeh legjitimitetin tuaj, por kërkon balancë dhe garanci për shtetin", thekson deputeti i PDK-së, duke sinjalizuar se propozimi nuk e vë në pikëpyetje rezultatin e Vetëvendosjes, por kërkon kundërpesha.

Për partinë e vet, Mustafa jep një premtim politik: "Besoj se PDK është e gatshme ta marrë pjesën e saj të përgjegjësisë".

Argumentin e mbyll me një paralajmërim ndaj zgjatjes së bllokadës. "Kosova nuk ka nevojë për trazira të reja politike, e as për kriza që nesër do të përdoren si justifikim për pranimin e një realiteti që mund ta ndryshojmë sot", thotë ai.

Deri më tani nuk ka një përgjigje publike nga Albin Kurti, nga Lëvizja Vetëvendosje apo nga përfaqësuesit e komuniteteve joshumicë ndaj kësaj thirrjeje.