Rrugët e Suharekës, punë të pakryera u certifikuan si të përfunduara: aktakuzë e Prokurorisë

Punime që, sipas verifikimeve në terren, nuk ishin kryer sipas kontratës, u pranuan dhe u certifikuan si të realizuara. Mbi këtë bazë, Prokuroria Themelore në Prizren, Departamenti i Krimeve të Rënda, ka ngritur aktakuzë për dy kontrata të ndërtimit të rrugëve në Komunën e Suharekës, të lidhura në vitet 2021 dhe 2022.

Aktakuza i ngarkon E.Sh., drejtor për Shërbime Publike, Mjedis dhe Emergjencë në Komunën e Suharekës dhe mbikëqyrës i drejtpërdrejtë i menaxherit të kontratës, dhe B.K., zyrtar për menaxhimin e projekteve dhe menaxher i kontratës, me dyshimin e bazuar mirë se në bashkëkryerje kanë kryer veprën penale "Keqpërdorimi i pozitës apo autoritetit zyrtar", nga neni 414 par.2 lidhur me par.1 dhe nenin 31 të KPRK-së.

Në të njëjtën çështje akuzohen edhe A.S. dhe B.S., persona përgjegjës të operatorëve ekonomikë, si dhe tre persona juridikë: "K.H." Sh.P.K., "I." Sh.P.K. dhe "H.S." Sh.P.K. Sipas Prokurorisë, secili veç e veç ka kryer veprën penale "Keqpërdorimi dhe mashtrimi në prokurim publik", nga neni 415 par.3 lidhur me par.2 të KPRK-së.

Rasti i parë lidhet me kontratën e vitit 2022. Sipas aktakuzës, dy zyrtarët komunalë gjatë menaxhimit dhe mbikëqyrjes së kontratës kanë pranuar dhe certifikuar punime si të realizuara, ndonëse verifikimet në terren kanë konstatuar se ato nuk ishin kryer sipas kontratës. Po ashtu, ndryshimet në pozicionet dhe lokacionet e punimeve nuk janë proceduar në pajtim me rregullat e prokurimit publik. Prokuroria pretendon se këto veprime i kanë sjellë operatorit ekonomik përfitim prej 8.301,78 eurosh, duke i shkaktuar Komunës së Suharekës dëm në të njëjtën shumë.

Rasti i dytë ka të bëjë me kontratën e vitit 2021. Sipas aktakuzës, B.K. dhe E.Sh., në cilësitë e tyre zyrtare, nuk i kanë përmbushur detyrat gjatë menaxhimit dhe mbikëqyrjes së kontratës: kanë pranuar punime si të përfunduara, ndonëse një pjesë e tyre nuk ishin realizuar sipas kontratës, dhe nuk i kanë proceduar ndryshimet kontraktuale sipas rregullave të prokurimit publik. Përfitimi i pretenduar i operatorit ekonomik në këtë rast është 1.661,20 euro, po aq sa edhe dëmi i pretenduar ndaj komunës.

Sa u përket operatorëve ekonomikë, Prokuroria pretendon se A.S. dhe personi juridik "H.S." Sh.P.K., tek kontrata e vitit 2021, nuk i kanë realizuar të gjitha punimet e kontraktuara, por kanë paraqitur dokumentacion për punime të kryera, me dëm prej 1.661,20 eurosh. Ndërsa B.S. dhe personat juridikë "I." Sh.P.K. e "K.H." Sh.P.K., tek kontrata e vitit 2022, dyshohet se nuk i kanë realizuar punimet sipas kontratës dhe kanë paraqitur dokumentacion për punime të kryera, duke i shkaktuar Komunës së Suharekës dëm prej 8.301,78 eurosh. Dëmi i përgjithshëm i pretenduar nga të dyja kontratat arrin në 9.962,98 euro, ndërsa Komuna e Suharekës figuron si palë e dëmtuar.

Prokurori i çështjes i ka propozuar gjykatës që, pas mbajtjes së shqyrtimit gjyqësor dhe administrimit e vlerësimit të provave, të pandehurit të shpallen fajtorë dhe të dënohen sipas ligjit. Për personat zyrtarë është kërkuar dënimi plotësues "Ndalimi i ushtrimit të funksioneve në administratën publike ose në shërbimin publik", kurse për personat juridikë "Ndalimi i ushtrimit të veprimtarisë", sipas KPRK-së.