ReklamëHapësirë reklame
ReklamëHapësirë reklame
Reklamë
Një helikopter që transportonte turistë në një safari u rrëzua në veri të Kenisë, duke vrarë të shtatë personat në bord. Mes viktimave janë shefi i inteligjencës së Ekuadorit dhe një gazetar amerikan.
Të gjithë shtatë personat në bord humbën jetën kur një helikopter që transportonte turistë në një safari u rrëzua në një zonë të thellë malore në veri të Kenisë. Mes të vdekurve janë një zyrtar i lartë i Ekuadorit dhe një gazetar amerikan.
Sipas Autoritetit të Aviacionit Civil të Kenisë, aparati u rrëzua në orën 9:13 të mëngjesit sipas kohës lokale (06:13 GMT) të mërkurën, ndërsa fluturonte nga Rezervati Loisaba drejt zonës së Ewaso Nyiro në qarkun Samburu. Autoriteti njoftoi se ka nisur një hetim për shkaqet e aksidentit. Aparati ishte një Eurocopter EC130 B4, sipas të njëjtit institucion.
Në bord ndodheshin gjashtë pasagjerë dhe piloti, thanë zyrtarët. David Nkoroi, komandanti i policisë për Samburun, u tha gazetarëve se të shtatë personat kishin vdekur, por nuk zbuloi identitetet e tyre.
Më vonë gjatë ditës së mërkurë, ministri i Transportit i Ekuadorit, Roberto Luque, bëri të ditur se mes viktimave ishin shefi i inteligjencës së vendit, Michele Sensi-Contugi, dhe bashkëshortja e tij, Stephany Hollihan. "Sot Michele dhe Stephany na lanë shumë herët. Mendoj për familjen e tyre, veçanërisht për fëmijët dhe prindërit e tyre", shkroi Luque në rrjetin social X.
Sensi-Contugi, 42 vjeç, ishte një ish-biznesmen i emëruar në vitin 2024 në krye të Qendrës Kombëtare të Inteligjencës së Ekuadorit. Ai konsiderohej bashkëpunëtor i ngushtë i presidentit të djathtë të Ekuadorit, Daniel Noboa, vend ky i përfshirë prej kohësh në një krizë sigurie.
Transmetuesi amerikan NBCUniversal njoftoi gjithashtu se mes të vdekurve ishte gazetari i tij Jose Alberto Suarez, president dhe drejtues i përgjithshëm i stacioneve Telemundo 31, Telemundo 49 dhe Telemundo Fort Myers–Naples. Një zëdhënës i Departamentit të Shtetit të SHBA-së tha se pesë shtetas amerikanë ishin mes viktimave. "Ambasada e SHBA-së është në kontakt me autoritetet lokale dhe po ofron ndihmë konsullore", tha ai, duke shtuar: "Ua shprehim ngushëllimet tona më të thella familjeve dhe të afërmve për humbjen."
Sipas mediave lokale, helikopteri u rrëzua në një terren të thyer në rrëzë të malit Ololokwe, një destinacion i njohur turistik. Aparati ishte pronë e kompanisë vendase Lady Lori Helicopters dhe transportonte mysafirë të kompanisë së udhëtimeve &Beyond. Lady Lori Helicopters deklaroi se aparati po kryente një fluturim me qira në momentin e aksidentit.
Në operacionet e kërkim-shpëtimit u përfshinë disa aktorë. Operatori vendas i safarive Tropic Air Kenya njoftoi se dërgoi dy helikopterë të tij për të ndihmuar, ndërsa Kryqi i Kuq i Kenisë tha se ekipet e tij të emergjencës po "merrnin pjesë në një përpjekje reagimi shumëagjencishe, ndërsa ekipet e shpëtimit punojnë për të aksesuar vendin e aksidentit".
Deri të mërkurën në mbrëmje, tre trupa mbeteshin ende të bllokuar në mbeturinat e aparatit, ndërsa operacionet e rikuperimit do të vazhdonin të enjten për shkak të flakëve që vijonin në vendngjarje, raportoi gazeta keniane Daily Nation.
Aksidentet me helikopterë janë bërë gjithnjë e më të shpeshta në Keni, një vend me një industri të gjallë turistike që mbështetet te operatorët vendas për të transportuar vizitorët drejt destinacioneve të largëta si mali Ololokwe. Në shkurt, një deputet kenian ishte mes gjashtë personave që humbën jetën në një rrëzim helikopteri në një zonë kodrinore të Kenisë perëndimore.
Gurë kalldrëmi të shkulur nga Parku Rinia, gaz lotsjellës dhe mbi 100 të arrestuar: protestat kundër qeverisë në Shqipëri hynë në ditën e shtatë pa asnjë shenjë qetësimi. Kryeministri Rama i quan pjesë të një sulmi të koordinuar, ndërsa protestuesit fajësojnë policinë për dhunën.
