Rregullatori i energjisë pa kuorum që nga gushti: tarifat, licencat dhe ankesat në pritje

Që nga 3 gushti 2026, Bordi i Zyrës së Rregullatorit për Energji (ZRRE) nuk ka marrë asnjë vendim. Tre anëtarëve u përfundoi mandati dhe institucioni që vendos për tarifat e energjisë elektrike, për licencat dhe për ankesat e konsumatorëve mbeti pa kuorumin që kërkon ligji.

Hapi i parë për ta zhbllokuar situatën erdhi më 25 shtator. Në një mbledhje elektronike, Qeveria e Kosovës miratoi dy vendime me të cilat i propozon Kuvendit kandidatët për kryesues të bordit dhe për dy anëtarë të tij. Nuk dihet se cilët emra i ka zgjedhur Qeveria, ndërsa fjalën e fundit për emërimin e ka Kuvendi.

ZRRE e shpjegon bllokimin me dispozitat e ligjit. "Sipas Ligjit nr. 05/L-084 për Rregullatorin e Energjisë, për marrjen e vendimeve kërkohet kuorumi prej së paku tre anëtarëve të Bordit", thuhet në përgjigjen e institucionit, të datës 23 shtator 2026. Sipas ZRRE-së, kompetencat vendimmarrëse të bordit nuk mund t'i kalojnë stafit profesional.

Kjo nuk do të thotë se zyra ka ndaluar punën. Stafi vazhdon detyrat që janë brenda kompetencave të tij, përfshirë monitorimin e operatorëve të licencuar. Por në tavolinë janë grumbulluar çështje që presin vendim të bordit: në licencim, në autorizime, në ankesat e konsumatorëve dhe në procese të tjera rregullative. ZRRE sqaron se këto raste nuk konsiderohen as të refuzuara, as të pezulluara, por për to nuk mund të vendoset derisa të rikthehet kuorumi. Ka edhe kërkesa për licenca në faza të ndryshme të shqyrtimit, numri i të cilave, sipas institucionit, ndryshon në varësi të aplikimeve, të plotësisë së dokumentacionit dhe të fazës së procedurës.

Të njëjtën pengesë e hasin investitorët që duan të ndërtojnë kapacitete të reja energjetike. Aplikimet e tyre mund të pranohen, të plotësohen dhe të procedohen, por procedurat që kërkojnë vendim të bordit nuk mund të përmbyllen. Edhe për konsumatorët pasojat janë të drejtpërdrejta: kur ligji kërkon që ankesën ta vendosë bordi, vendimi përfundimtar mbetet i pamundur, dhe ZRRE paralajmëron se koha e trajtimit të këtyre rasteve mund të zgjatet.

Në pritje mbetet edhe një nga kompetencat më të ndjeshme të rregullatorit: përcaktimi apo ndryshimi i tarifave të energjisë elektrike. Pa bord funksional kjo nuk mund të bëhet. Deri në vendimet e reja, sipas ZRRE-së, zbatohen tarifat ekzistuese, sipas afateve dhe kushteve të vendimeve tarifore në fuqi.

Procedura për plotësimin e vendeve bosh nisi muaj më parë. Ministria e Ekonomisë, si ministri përgjegjëse për sektorin e energjisë, shpalli më 28 prill 2026 konkurs publik për kryesuesin dhe dy anëtarë të bordit. "Për pozitën Kryesuesit të Bordit të Zyrës së Rregullatorit për Energji janë pranuar nëntë (9) aplikacione dhe për pozitën (2) Anëtarë të Bordit janë pranuar trembëdhjetë (13) aplikacione", sipas ministrisë. Në listën e ngushtë hynë pesë kandidatë për kryesues dhe dymbëdhjetë për dy vendet e anëtarëve. Gjatë vlerësimit, përzgjedhjes së listës së ngushtë dhe intervistave, një përfaqësues i Sekretariatit të Komunitetit të Energjisë mori pjesë si monitorues i procedurës. Komisioni i intervistoi kandidatët më 17 dhe 18 gusht, pikërisht në javët kur bordi kishte mbetur pa kuorum.