Rokadë diplomatike: Meidani drejt Prishtinës, Malaj merr ambasadën në Shkup

Dy ambasadorët e Shqipërisë në dy kryeqytetet fqinje pritet të shkëmbejnë vendet. Denion Meidani, që aktualisht drejton ambasadën në Shkup, propozohet të marrë drejtimin e diplomacisë shqiptare në Prishtinë, ndërsa Petrit Malaj, ambasador në Kosovë prej tre vitesh, është propozuar për ambasadën në Shkup.

Të dy do të paraqiten më 9 tetor në Komisionin Parlamentar për Punët e Jashtme, në dy dëgjesa që konsiderohen si një rokadë ambasadorësh, sipas një anëtari të komisionit që foli për Top Channel. Meidani do të dëgjohet si kandidat për Prishtinën, kurse Malaj do të paraqesë platformën e tij për drejtimin e ambasadës në Shkup.

Lëvizja çon përpara një ide që ministri i Punëve të Jashtme, Ferit Hoxha, e kishte hedhur disa muaj më parë. Relacioni shoqërues i ministrit për dy propozimet, pra arsyeja pse ai e ka parë të nevojshme këtë rokadë, mbetet ende i paqartë.

Zanafilla e ndryshimeve daton që në maj, kur Meidani u rreshtua në krah të protestave të studentëve shqiptarë në Shkup. Në atë kohë, disa raportime sugjeronin se Hoxha kishte marrë ankesa nga VMRO, partia qeverisëse në Maqedoninë e Veriut, dhe nga aleati i saj shqiptar VLEN, për qëndrimet dhe rolin e ambasadorit në ato protesta.

Ministria për Evropën dhe Punët e Jashtme i hodhi poshtë këto pretendime si tërësisht të pabazuara. Në një reagim për mediat, ministria theksoi se "çdo vendimmarrje për emërimet apo lëvizjet diplomatike bëhet në përputhje me legjislacionin në fuqi dhe se këto procese bazohen në analiza profesionale dhe institucionale, me synim përdorimin sa më efikas të burimeve njerëzore dhe në funksion të prioriteteve të politikës së jashtme të Shqipërisë".

Mandati i Meidanit në Shkup u shoqërua me avancimin e projektit One Stop Shop, shpërndarjen e Abetares së Unifikuar dhe qëndrime të forta diplomatike. Ai mbështeti gjithashtu studentët shqiptarë në kauzën e tyre që provimi i jurisprudencës të zhvillohet edhe në gjuhën shqipe.

Shkëmbimi Shkup-Prishtinë nuk është e vetmja lëvizje në rrjetin diplomatik shqiptar. Javën e shkuar, i njëjti komision zhvilloi dëgjesën me Uran Ferizin, ambasadorin në Londër, të cilit i është besuar drejtimi i Misionit të Shqipërisë në OSBE në Vjenë. Kush do ta zëvendësojë në Britaninë e Madhe nuk është vendosur ende.