"Jo në emrin tim": Reçaku kundërshton aktgjykimin e Speciales

Në vendin ku janë varrosur 45 civilët e vrarë më 15 janar 1999, qindra njerëz u mblodhën sonte për të thënë se aktgjykimi i Gjykatës Speciale ndaj krerëve të Ushtrisë Çlirimtare të Kosovës nuk flet në emër të tyre.

Tubimi u mbajt në Kompleksin Përkujtimor të Reçakut dhe solli bashkë banorë të fshatit e qytetarë të Shtimes, familjarë të martirëve dhe dëshmorëve, veteranë e invalidë të UÇK-së.

Fjalën para të pranishmëve e mbajti Bajram Hajrizi, i cili e cilësoi vendimin të padrejtë dhe u ndal te kontrasti mes dënimeve ndaj katër ish-krerëve të UÇK-së dhe mungesës së përgjegjësisë për masakrën e Reçakut. "Për katër ish-krerë të Ushtrisë Çlirimtare të Kosovës, sot kemi një aktgjykim me gjithsej 81 vite burgim, ndërsa për 45 civilët e Reçakut, familjet e tyre ende presin drejtësi", tha ai.

Hajrizi kërkoi që drejtësia të zbatohet me të njëjtin standard për të gjitha viktimat e luftës në Kosovë. Ai i bëri thirrje edhe Kuvendit të Republikës së Kosovës që të ndërmarrë hapat institucionalë dhe kushtetues lidhur me të ardhmen e Gjykatës.

Gjatë tubimit pati brohoritje në mbështetje të UÇK-së dhe të emrave të Hashim Thaçit, Jakup Krasniqit, Kadri Veselit dhe Rexhep Selimit.

Mbrëmja u mbyll me premtimin se Reçaku nuk do ta harrojë sakrificën e viktimave dhe se familjet e 45 civilëve të vrarë vazhdojnë ta kërkojnë drejtësinë. "Lavdi të gjithë martirëve dhe dëshmorëve të Kosovës dhe urojmë që çlirimtarët të kthehen në familjet e tyre, në vendin që e çliruan dhe ndërtuan", u tha në përmbyllje të tubimit.