Reagime zinxhir pas dënimeve në Hagë: protestë para gjykatës dhe arrestime nga policia holandeze

Pas shpalljes së dënimeve ndaj Hashim Thaçit, Kadri Veselit, Jakup Krasniqit dhe Rexhep Selimit, tensioni u zhvendos nga salla e gjyqit në rrugën para gjykatës në Hagë. Qytetarë të mbledhur atje kanë goditur me grushte dhe kanë hipur mbi kombin e policisë. Policia holandeze ka arrestuar disa mbështetës të krerëve të UÇK-së, pa u bërë i ditur numri i tyre.

Gjykata Speciale i dënoi Thaçin dhe Krasniqin me nga 25 vjet burgim, Veselin me 18 vjet dhe Selimin me 13 vjet, dënime që sipas Partisë Demokratike të Kosovës arrijnë në 81 vite burgim gjithsej.

Reagimi më i gjerë politik erdhi nga PDK-ja, e cila në një komunikatë për media shprehu indinjatën, zhgënjimin dhe kundërshtimin ndaj vendimit. Partia thotë se në Hagë "u godit rëndë e drejta e popullit tonë që luftoi për liri, mbijetesë dhe çlirim nga regjimi shtetëror serb që vrau, dëboi dhe terrorizoi shqiptarët e Kosovës".

"Për ne, ky aktgjykim është një padrejtësi e madhe, sepse mbështetet në pretendime e materiale që i konsiderojmë të fabrikuara dhe të ushqyera ndër vite nga aparati shtetëror dhe propaganda e Serbisë për ta kriminalizuar luftën e drejtë të Ushtrisë Çlirimtare të Kosovës. Ky aktgjykim mund të jetë shkruar në Hagë. Por historia e Kosovës është shkruar këtu, me sakrificë, gjak dhe luftë për liri. Dhe ajo nuk rishkruhet sot. Historia jonë është shkruar nga populli ynë që luftoi për mbijetesë, nga mijëra dëshmorë e martirë, nga qindra mijëra qytetarë të dëbuar prej shtëpive të tyre dhe nga një aleancë historike me botën demokratike që, në vitin 1999, i dha fund represionit dhe spastrimit etnik të regjimit serb në Kosovë", thuhet në reagimin e PDK-së.

Partia insiston se agresori ishte Serbia dhe Kosova viktimë, ndërsa UÇK-ja ishte përgjigjja e popullit që kërkonte të jetonte i lirë, dhe se këtë të vërtetë nuk mund ta ndryshojë asnjë aktgjykim.

"Hashim Thaçi, Kadri Veseli, Jakup Krasniqi dhe Rexhep Selimi nuk shkuan në Hagë duke ikur nga drejtësia. Ata i u përgjigjën asaj vullnetarisht, me besimin se e vërteta do të triumfonte. Prandaj, vendimi i sotëm është një goditje e rëndë për luftën e UÇK-së, lirinë, pavarësinë dhe shtetin e Kosovës. Sot, qytetarët e Kosovës ndihen të lënduar dhe të zhgënjyer nga ky aktgjykim i padrejtë", shtoi PDK-ja.

Partia njoftoi se aktgjykimin do ta kundërshtojë me argumente, me të gjitha mjetet demokratike dhe në çdo forum ku, sipas saj, duhet mbrojtur e vërteta për luftën e Kosovës.

"Për ne, lufta e UÇK-së ishte e drejtë, mbrojtëse dhe çlirimtare. Dhe njerëzit që udhëhoqën luftën dhe proceset politike që sollën lirinë dhe shtetin e Kosovës nuk mund të fshihen nga historia me një vendim gjyqësor. Sot është një ditë e rëndë për Kosovën. Por sot nuk përfundon as historia, as beteja për të vërtetën. Partia Demokratike e Kosovës do të qëndrojë përherë në mbrojtje të së vërtetës historike, të dinjitetit të luftës çlirimtare dhe të atyre që morën mbi vete barrën e lirisë së Kosovës. Ky aktgjykim nuk është fjala e fundit. Ne për drejtësinë do të luftojmë deri në fund dhe për të vërtetën nuk do të heshtim kurrë. Heronjtë tanë të luftës dhe paqes nuk do t'i lëmë kurrë vetëm. Beteja vazhdon, me ta dhe për ta, deri në lirimin e tyre", përfundon komunikata.