Reagime pas verdiktit: Serweri thotë se "gjykata është e padrejtë", Vuçiçi kërkon të mos festojnë serbët

Verdikti i fajësisë i Dhomave të Specializuara ndaj katër ish-drejtuesve të Ushtrisë Çlirimtare të Kosovës vazhdon të prodhojë reagime të kundërta, nga Uashingtoni deri në Beograd.

Profesori amerikan dhe eksperti i çështjeve ballkanike, Daniel Serwer, e ka cilësuar të padrejtë jo vetëm vendimin, por të gjithë gjykatën. Në një shkrim opinioni të botuar në faqen e tij të internetit "Peacefare.net", Serwer shkruan se amerikanët dhe evropianët duhet të kenë turp për kriminalizimin e një lëvizjeje çlirimtare që ata vetë e kishin mbështetur dhe për reduktimin e drejtësisë ndërkombëtare në hakmarrje politike.

"Pyetja më e ngutshme është se çfarë ndodh në Kosovë. Shumë shqiptarë atje do ta shohin rezultatin si të padrejtë. Ata do të protestojnë me zemërim, por shpresoj në mënyrë paqësore. Dhuna nuk do të arrijë asgjë. Verdiktet do t'i kënaqin, por nuk do t'i bindin plotësisht, shumë serbë. Disa mund të festojnë. Edhe atje, dhuna nuk do të arrijë asgjë", shkruan Serwer.

"Amerikanët dhe evropianët duhet të kenë turp. Ata kanë kriminalizuar një lëvizje çlirimtare që e mbështetën dhe kanë reduktuar drejtësinë ndërkombëtare në hakmarrje politike. Por ata kanë kaluar përpara dhe nuk do t'i kushtojnë shumë vëmendje kësaj. Ky është edhe një mësim tjetër pse nuk duhet të jesh tepër i afërt me Uashingtonin dhe Brukselin. Nuk është vetëm verdikti i padrejtë. Edhe gjykata është", thuhet në shkrimin e tij.

Hashim Thaçi dhe Jakup Krasniqi u dënuan me 25 vjet burgim secili për krime lufte, Kadri Veseli me 18 vjet dhe Rexhep Selimi me 13 vjet.

Në Beograd, i pyetur për vendimin që i dënon ish-drejtuesit e UÇK-së me 81 vjet burgim të kombinuar, presidenti i Serbisë, Aleksandar Vuçiç, u bëri thirrje serbëve të mos e konsiderojnë procesin të përfunduar dhe të mos festojnë. Ai vazhdoi të pretendojë se aktgjykimi nuk përfshiu atë që e përshkroi si akuzat më të rënda që Serbia ka ngritur ndaj UÇK-së.

"Nuk kemi arsye as të gëzohemi, as të trishtohemi. Edhe sikur aktgjykimi të mbetet në fuqi, gjë që e kam të vështirë të besoj, ekziston edhe një instancë e tretë, Gjykata Kushtetuese e të ashtuquajturës Kosovë, që mund ta kthejë çështjen për rigjykim. Për këtë arsye, ne nuk duhet t'i dalim përpara këtij vendimi me eufori, por duhet të mbetemi të durueshëm", deklaroi ai.

Gjatë konferencës për shtyp, Vuçiçi shfaqi publikisht fotografi të serbëve të vrarë, duke pretenduar se përgjegjësit për vdekjen e tyre nuk janë ndëshkuar. Argumentin e tij ai e ndërtoi mbi faktin që Dhomat e Specializuara hodhën poshtë gjashtë pika të akuzës për krime kundër njerëzimit. Sipas Vuçiçit, kjo tregon se gjykata "nuk dëshironte të minonte kredibilitetin e UÇK-së" dhe se nuk e pranoi narrativën që Serbia mban prej vitesh.