Rasti “Brezovica”: kryeinspektori Bedri Halimi shpallet i pafajshëm për ndërtimet pa leje

Tre vjet pas ngritjes së aktakuzës për shtëpitë e pushimit dhe objektet hoteliere që u ngritën në zemrën e Parkut Kombëtar “Sharri”, kryeinspektori i Ministrisë së Mjedisit, Planifikimit Hapësinor dhe Infrastrukturës, Bedri Halimi, është shpallur i pafajshëm në rastin e njohur si “Brezovica”. Vendimi i gjykatës i është komunikuar sot, ndërsa lajmin e bëri të ditur avokati i tij, Haxhi Millaku.

Halimi ishte pjesë e aktakuzës së ngritur më 9 dhjetor 2022 nga Prokuroria Themelore në Ferizaj kundër 12 personave, në rastin e regjistruar si “Brezovica 1”. Ai ngarkohej me veprën penale “Keqpërdorimi i pozitës apo autoritetit zyrtar”, pikërisht për veprimet që, sipas prokurorisë, duhej t’i ndërmerrte në cilësinë e kryeinspektorit.

Sipas aktakuzës, nga fillimi i vitit 2013 deri më 20 dhjetor 2021, ai nuk kishte ndërmarrë masa ligjore dhe ekzekutive për ndalimin e ndërtimit të shtëpive të pushimit dhe të objekteve hoteliere në zonën e Brezovicës, brenda Parkut Kombëtar “Sharri”. Organi i akuzës pretendonte se Halimi ishte në dijeni që objektet po ngriheshin pa pëlqime mjedisore dhe pranë lumit, ndërsa disa prej tyre edhe në zonën e dytë të parkut, dhe se mosveprimi i tij kishte për qëllim përfitimin e dobisë pasurore për persona të tjerë. Këto mbetën pretendime të prokurorisë, të cilat gjykata nuk i vërtetoi ndaj tij.

Procedura ndaj kryeinspektorit ishte veçuar nga ajo ndaj të akuzuarve të tjerë. Vendimi për veçim ishte marrë në seancën e 8 janarit 2025, nga kryetarja e trupit gjykues, Nushe Kuka-Mekaj, pas aprovimit të kërkesës së tij. Procesi kryesor për rastin “Brezovica” po zhvillohej në Gjykatën Themelore në Pejë.

Aktakuza fillestare kishte përfshirë emra të rëndë të administratës lokale dhe qendrore: ish-kryetarin e Komunës së Shtërpcës, Bratisllav Nikoliq, ish-sekretarin e përgjithshëm të Ministrisë së Mjedisit, Arben Çitaku, si dhe zyrtarë të tjerë. Akuzat ndaj tyre lidheshin me ndërtimet në Brezovicë dhe me dyshimet për keqpërdorim të detyrës zyrtare e vepra të tjera penale. Të gjithë ata prezumohen të pafajshëm derisa fajësia të provohet me vendim të formës së prerë.

Arsyetimi i plotë i gjykatës nuk është publikuar, ndërsa nuk është sqaruar as as nëse aktgjykimi ndaj Halimit ka marrë formë të prerë.