Ligji e parashikonte para 10 vjetësh: veteranët ende pa Qendër Posttraumatike

Një qendër për trajtimin e traumave të luftës, e parashikuar me ligj prej më shumë se një dekade, nuk ekziston ende. Ndërkohë, Organizata e Veteranëve të Luftës (OVL-UÇK) flet për raste vetëvrasjesh mes veteranëve për shkak të traumave.

Qendra për Informim dhe Përmirësim Social, bashkë me GLPS-në, i ka dorëzuar Komisionit të Kuvendit për Mirëqenie Sociale, Punë, Familje e Vlerat e Luftës kërkesën për themelimin e Qendrës Posttraumatike. Ligji për Veteranët, i miratuar më shumë se 10 vjet më parë, e parashikonte këtë qendër ndër të tjera, por gjatë gjithë kësaj periudhe nuk është ndërmarrë asnjë hap për ngritjen e saj.

Bind Skeja, nga Qendra për Informim dhe Përmirësim Social, ua ngarkon përgjegjësinë dy ministrive që ligji i cakton si bartëse të këtij detyrimi. "Fakti që kanë kaluar mbi 10 vjet dhe nuk ka pasur asnjë iniciativë as nga Ministria e Shëndetësisë e as nga Mirëqenia Sociale që janë të përfshira si përgjegjëse në këtë ligj na ka shty neve që tash me ju drejtu Kuvendit, komisioni përkatës që ato me i kërku llogaridhënie këtyre ministrive", deklaroi ai.

Skeja nuk pret refuzim, por druan zvarritje. "Unë nuk e besoj që ka ndonjë arsye që Ministria e Shëndetësisë apo e Punës me refuzu e vetmja që mundet me ndodh është se munden me zhagit si proces por ne bashkë me GLPS-në kemi me i qëndru afër edhe nëse Kuvendi nuk e trajton me seriozitet atëherë do t’i shohim rrugët tjera ligjore", paralajmëroi ai.

Kërkesa ka mbështetjen e veteranëve. Sipas OVL-UÇK-së, kjo ndihmë është dashur prej kohësh. "Po kemi pas raste edhe të vetëvrasjeve të veteranëve prandaj kjo kishte me qenë shumë e mirë me u marr me këtë çështje me trajtu dhe me iu ndihmu veteranëve", tha Fatmir Sopi, nënkryetar i OVL-UÇK-së. Ai shprehet optimist për qëndrimin e institucioneve: "Jam i bindur që nuk duhet me has në rezistencë, jam i bindur që shteti duhet me mirëpritë këtë".

Nga ana e institucioneve, Ministria e Shëndetësisë u përgjigj se deri tani nuk ka pranuar ndonjë kërkesë, ndërsa Ministria për Mirëqenie Sociale nuk ktheu përgjigje.