Rama përplaset me nacionalistët: "Liria nuk funksionon me parimin më jep të të jap"

Deklarata e presidentit ukrainas Volodymyr Zelensky në Beograd, se Kievi nuk e njeh pavarësinë e Kosovës, ka nxitur një reagim të ashpër të kryeministrit shqiptar Edi Rama, i cili refuzon ta lidhë mbështetjen për Ukrainën me qëndrimin e saj ndaj Kosovës.

Rama e cilëson të gabuar pozicionin e Ukrainës për Kosovën, por këmbëngul se kjo nuk ndryshon asgjë nga e drejta e Kievit për të qenë i lirë dhe për t'u mbrojtur nga agresioni rus. "Ukraina mund të jetë, dhe po, është gabim për Kosovën, por e drejta e saj për të qenë e lirë mbetet e padiskutueshme", shkroi ai.

Sipas kryeministrit, solidariteti me një vend nën agresion nuk mund të trajtohet si një marrëdhënie shkëmbimi, ku qëndrimi politik i palës tjetër vendos nëse ajo meriton apo jo mbështetje. "Liria nuk funksionon me cashback. Të qëndrosh kundër një lufte agresioni dhe për një paqe të drejtë nuk është një faturë që e gris kur viktima e një agresioni barbar të zhgënjen", tha ai, duke shtuar: "Çfarë turpi të humbasësh nga sytë të vërtetën e thjeshtë se liria nuk funksionon me cashback."

Në reagimin e tij, Rama u drejtohet drejtpërdrejt atyre që, sipas tij, kërkojnë të "ndëshkohet" Ukraina për shkak të qëndrimit ndaj Kosovës. "Miku im i dashur, Volodymyr Zelensky, qëndroi në Beograd dhe tha se Ukraina nuk do ta njohë kurrë Kosovën. Brenda një ore, nacionalistët më të zëshëm në Tiranë dhe Prishtinë nisën të bënin llogaritë gjeopolitike: ndoshta duhet ta ndëshkojmë Ukrainën, të ndalojmë së mbështeturi një popull të lirë dhe së vajtuari për ata që janë bombarduar. Më të papërgjegjshmit prej tyre na sulmuan pse nuk hoqëm dorë nga Ukraina. Disa madje brohoritën për Rusinë!", shkroi ai.

Kryeministri argumenton se Shqipëria mund të mbajë njëkohësisht dy qëndrime: mbështetjen për lirinë e Ukrainës dhe mbrojtjen e çështjes së Kosovës. "Ukraina mund të jetë, dhe po, është gabim për Kosovën, por e drejta e saj për të qenë e lirë mbetet e padiskutueshme. Dhe të luftosh për këtë të drejtë do të thotë të luftosh edhe për Evropën dhe për veten tonë. Këto të vërteta mund të qëndrojnë fare mirë në të njëjtën fjali", vijoi ai, duke nënvizuar: "Shqipëria është mjaftueshëm e pjekur për t'i mbajtur të dyja dhe do t'i mbajë."

Ai e mbylli mesazhin me një përkushtim të hapur ndaj Kievit: "Pra, po: RROFTË UKRAINA E LIRË! Sot, nesër dhe përgjithmonë."

Reagimi i Ramës erdhi pas vizitës së Zelenskyt në Beograd më 8 gusht, ku presidenti ukrainas rikonfirmoi se Kievi nuk ka ndryshuar qëndrimin për mosnjohjen e pavarësisë së Kosovës. Deklarata shkaktoi kundërveprime edhe në Prishtinë: kryetari i kryeqytetit, Përparim Rama, njoftoi heqjen e pankartës "Free Ukraine".