Rama paralajmëron ministri të re për administratën publike, Pirdeni pritet ta drejtojë

Administrata publike në Shqipëri do të ngrihet në rangun e një ministrie më vete. Kryeministri Edi Rama njoftoi se Ministria e Administratës Publike do të krijohet javën e ardhshme, si një institucion që, sipas tij, do të ketë rol të rëndësishëm në modernizimin e administratës shtetërore dhe në përparimin e procesit të integrimit evropian të vendit.

Në fjalimin e tij, Rama e paraqiti administratën publike si një nga përparësitë kryesore në axhendën e qeverisë dhe si element thelbësor për zhvillimin e mëtejshëm të Shqipërisë si shtet evropian. "Javën e ardhshme do të krijojmë Ministrinë e Administratës Publike, pikërisht sepse administrata publike tashmë është bërë një çështje qendrore në punën e qeverisë, por edhe një çështje qendrore në zhvillimin e mëtejshëm të Shqipërisë si shtet evropian", tha kryeministri.

Sipas Ramës, qëllimi i institucionit të ri është zgjerimi i përgjegjësive dhe i objektivave për përmirësimin e funksionimit të administratës, duke ndjekur praktikat e vendeve të tjera evropiane. "Ka nevojë, përmes Ministrisë së Administratës Publike, një model që ekziston në shumë vende të tjera evropiane, për të zgjeruar gamën e përgjegjësive, fushën e punës dhe, natyrisht, ambiciet tona për ta forcuar më tej shtetin evropian të popullit shqiptar", deklaroi ai.

Për drejtimin e ministrisë së re, Rama la të kuptohet se zgjedhja pritet të bjerë mbi Adea Pirdenin, aktualisht ministre e Shtetit për Administratën Publike. Kryeministri theksoi se përgjegjësia duhet t'i besohet strukturës që e mbulon sot këtë fushë. "Për mua, nuk ka asnjë dyshim se Ministria e Administratës Publike mund të drejtohet vetëm nga ministrja aktuale e Shtetit për Administratën Publike", tha Rama.

Kryeministri falënderoi përfaqësuesit e administratës publike për angazhimin e tyre. Krijimi i ministrisë së re pritet të konfirmohet zyrtarisht javën e ardhshme.