Rama nënshkruan nismën e IKD-së: Kush keqpërdor paratë publike duhet të përfundojë në burg

Kryetari i Komunës së Prishtinës, Përparim Rama, ka nënshkruar nismën legjislative qytetare të Institutit të Kosovës për Drejtësi (IKD) për ndryshimin e Kodit Penal, duke kërkuar që kushdo që keqpërdor fondet publike të mbajë përgjegjësi penale.

Rama e ka cilësuar nismën si një hap të rëndësishëm drejt forcimit të demokracisë dhe qytetarizmit aktiv. "Demokracia po fillon me qytetarizëm aktiv. Ju përgëzoj për këtë nismë… nismë me të cilën tregojnë që populli ynë, në njëfarë mënyre edhe ka filluar një vetëdijësim edhe më të qartë, të jetë në nivelin shoqëror, ku edhe kërkon përgjegjësi nga institucionet, kërkon përgjegjësi nga politikanët, kërkon përgjegjësi nga secili qytetar që të respektohen vendimet e Gjykatës Kushtetuese, pra që të respektohet ligji në fuqi, që të respektohet faktikisht shteti", tha ai.

Në qendër të deklaratës së tij ishte respektimi i vendimeve të Gjykatës Kushtetuese, të cilat, sipas Ramës, janë të pandashme nga respektimi i vetë shtetit. "Sepse person, kushdo që ata janë, nëse nuk e respektojnë… nëse nuk i respektojnë vendimet e Gjykatës Kushtetuese, në njëfarë mënyre nuk po e respektojnë as shtetin", tha ai.

Kryetari i kryeqytetit ndaloi veçanërisht te ajo që e quajti keqpërdorim i fondeve publike për nevoja partiake, të cilin sipas tij e vendosi në dhjetor dhe në qershor. "Po ashtu edhe ata të cilët, partitë apo personat, të cilët i kanë keqpërdorur ligjin apo i kanë keqpërdorur fondet publike për nevojat e veta partiake, pra siç ka ndodhur edhe në dhjetor, edhe tash në qershor, ku paratë publike janë përdorur në njëfarë mënyre për me i blerë votat, këto janë gjëra të jashtëligjshme për të cilat edhe duhet me u përgjigjur para Gjykatës Kushtetuese, pra duhet njerëzit me shku në burg nëse i kanë keqpërdorur paratë publike", u shpreh Rama.

Ai e paraqiti çështjen si detyrë të mbarë shoqërisë. "Këto janë gjëra të cilat ne të gjithë si shoqëri pra duhet t'i shtyjmë përpara, pra që vendimet e Gjykatës Kushtetuese të jenë të plotfuqishme dhe secili qytetar t'i respektojë ato, përndryshe e rrezikojmë shtetin", tha ai.

Duke shpjeguar arsyen e pjesëmarrjes së tij, Rama tha: "Kjo është edhe arsyeja pse unë jam sot këtu, e nënshkrova këtë peticion, këtë nismë. Dhe i përgëzoj të gjithë qytetarët e Kryeqytetit dhe të gjithë Kosovës të cilët janë bërë pjesë e kësaj nisme."

Ai pret që së shpejti të mblidhen mbi 10 mijë nënshkrime për t'i dhënë nismës hapin e radhës drejt legjislacionit. "Uroj që së shpejti të kemi më shumë se 10.000 apo 12.000 e më tepër, pra më shumë se 10.000 nënshkrime, ku edhe vendimet ose nënshkrimet e këtij peticioni pastaj të marrin hapat e veta dhe të bëhet pjesë e ligjit, pjesë e ligjit i cili edhe mundëson vendimet që kushdo që nuk e respekton ligjin, pra përfundon aty ku edhe meriton, përfundon në burg", tha ai.