Radulloviq sulmon Listën Serbe në Kuvend: Vetëm me armë mund të më largoni

Nga foltorja e Kuvendit të Kosovës, deputeti Lazar Radulloviq, nga Partia për Liri, Drejtësi dhe Mbijetesë, iu drejtua drejtpërdrejt deputetëve të Listës Serbe me një akuzë të rëndë: sipas tij, kjo parti ka tentuar ta pengojë zgjedhjen e tij si deputet dhe ta frikësojë përmes presioneve dhe sulmeve.

Radulloviq tha se u kishte borxh një përgjigje kolegëve të Listës Serbe, të cilët, sipas tij, gjatë procesit zgjedhor u ankuan në Gjykatën Supreme për të kontestuar kandidaturën e tij.

Ai ktheu vëmendjen edhe te një rast nga mandatet e kaluara. Sipas Radulloviqit, një deputet i partisë së Nenad Rashiqit kaloi në Listën Serbe vetëm pak ditë pasi kishte ardhur në Kuvend. Radulloviq pretendoi se ai deputet ishte joshur dhe paguar për të ndryshuar subjekt politik.

"Problemi i Listës Serbe është që mua nuk mund të më blejnë, e as të më frikësojnë", deklaroi ai.

Deputeti serb tregoi se kohëve të fundit ka pasur probleme, përfshirë sulme fizike dhe shpërthimin e gomave të veturës së tij. Ai nuk tha kush qëndron pas këtyre veprimeve, por ishte i prerë se ato nuk do ta detyrojnë të lëshojë vendin në Kuvend.

"E vetmja mënyrë që të më largoni nga ky vend është që të më gjuani me armë. Mënyra të tjera nuk ka që mund të ma merrni vendin që e kam në këtë Kuvend", u shpreh Radulloviq.

Tonet u ashpërsuan më tej kur ai e akuzoi Listën Serbe se vepron nën ndikimin e Beogradit dhe e cilësoi organizatë kriminale. "Ju nuk po ju them juve, sepse ju jeni pionë që jeni të ulur këtu dhe i merrni porositë nga Beogradi, por organizata juaj kriminale është e gatshme për gjithçka", deklaroi ai, duke iu drejtuar deputetëve të kësaj partie.

Radulloviq e mbylli fjalimin duke theksuar se nuk do të frikësohet nga presionet që pretendon se po i bëhen. Akuzat e tij mbeten pretendime, ndërsa një reagim i Listës Serbe nuk është bërë publik.