Qumështoret nisin largimet: rreth 200 punëtorë pa punë, të tjerë rrezikojnë nga 1 nëntori

Rreth 200 punëtorë të fabrikave të qumështit në Kosovë kanë humbur vendin e punës, sipas të dhënave jozyrtare. Për Gani Durmishin, nga Shoqata e Industrisë së Qumështorëve, shkaku ka një emër të qartë: aksioni që Ministria e Bujqësisë dhe AUV-ja zhvilluan muaj më parë në kompanitë e qumështit në vend.

Në zemër të problemit është vendimi i ministrit të atëhershëm të Bujqësisë dhe i AUV-së, me të cilin, sipas Durmishit, mbi 14 qumështoreve iu ndërpre prodhimi i disa produkteve me përbërje me prejardhje bimore. Që atëherë, linjat që prodhonin këto artikuj kanë mbetur të fikura.

Durmishi rrëfen se fabrikat pritën rreth dy muaj, duke u përpjekur ta shpëtojnë situatën dhe të vazhdojnë t'i paguajnë punëtorët. Pritja nuk dha rezultat. Tani kompanitë kanë nisur të largojnë pikërisht ata punëtorë që ishin të angazhuar në prodhimin e produkteve të ndaluara, sepse, siç tha ai, "nuk po kanë punë".

Sipas tij, qumështoreve u ishte premtuar një rrugëdalje: do të formohej një komision, i cili do të bënte kontrolle dhe do të jepte pëlqim për një periudhë pesëmujore. Komisioni u formua dhe kontrollet nëpër qumështore u bënë, por, sipas Durmishit, asnjë pëlqim nuk u lëshua dhe leja për rinisjen e prodhimit ende nuk ka ardhur.

Kjo është arsyeja pse, sipas tij, largimet do të vazhdojnë "derisa qeveria nuk merr vendim" që t'u lejojë qumështoreve prodhimin e këtyre produkteve.

Edhe nëse leja jepet, dëmi nuk riparohet lehtë. Durmishi shpjegon se dy muaj pa prodhim u kanë kushtuar kompanive vendin në treg, ndërsa importi ka "zënë raftet në markete". Megjithatë, ai thotë se punëtorët e larguar do të ktheheshin menjëherë nëse bllokada hiqet.

"Është problem se që dy muaj ne nuk kemi prodhu, edhe na i kanë zënë vendet, importet na i kanë zënë raftet nëpër markete. Nëse na jepin leje, edhe lëshojna prodhim, normal që ata punëtorë ata kanë përvojën, praktikën, edhe ne menjëherë kishim fillu me i kthy punëtorët nëpër vendet e punës ku kanë qenë. Për momentin deri sa kemi këtë bllokadë nga institucionet, nuk po i lajnë qumështorët me prodhu, normal që nuk mujn i kthejnë se s'kanë ça me iu dhanë punë", tha ai.

I pyetur nëse e gjithë kjo është pasojë e aksionit të Ministrisë së Bujqësisë dhe AUV-së, Durmishi u përgjigj pa mëdyshje dhe paralajmëroi një valë të re largimesh: "Po, po. Edhe pritet qetash që edhe një numër i konsiderueshëm me u përjashtu prej vendeve të punës. Qetash në nëntor, prej 1 nëntorit."