Qeveria në detyrë e Kurtit mblidhet online: qiradhënie dhe komisione për 18 poste drejtuese

Pas një dite plot tension në Kuvendin e Kosovës, kryeministri në detyrë Albin Kurti mblodhi të mërkurën mbrëma kabinetin e tij përmes një mbledhjeje online. Vendimet e marra u bënë të ditura nga Zyra e Kryeministrit.

Në qendër të vendimeve qëndron miratimi i qiradhënies së parcelave në Zonën Kadastrale Cërnillë, në Komunën e Ferizajt. Sipas ZKM-së, vendimi u mor sipas kërkesës së Ministrisë së Bujqësisë, Pylltarisë dhe Zhvillimit Rural dhe parasheh dhënien me qira të tokës për nxjerrjen dhe shfrytëzimin e gurit gëlqeror, në një kohëzgjatje deri më 18 dhjetor 2033.

Pjesa më e madhe e mbledhjes iu kushtua administratës: qeveria në detyrë miratoi një varg vendimesh për emërimin e Komisioneve të Pranimit që do të merren me plotësimin e pozitave të kategorisë së lartë drejtuese në institucione qendrore.

Ndër to janë pozitat e drejtorit ekzekutiv në Agjencinë Qendrore të Prokurimit, në Thesarin e Kosovës, në Agjencinë Kosovare për Standardizim, në Agjencinë për Pronësi Industriale, në Agjencinë për Siguri Kibernetike, në Agjencinë për Mbrojtjen e Mjedisit të Kosovës, si dhe në Agjencinë për Inovacion dhe Përkrahje të Ndërmarrjeve në Republikën e Kosovës.

Lista përfshin gjithashtu drejtorët ekzekutivë të Agjencisë Antidoping, të Agjencisë së Sportit, të Agjencisë për Zhvillimin e Rinisë, të Inspektoratit për Trashëgimi Kulturore, të Inspektoratit të Ministrisë së Drejtësisë dhe të Agjencisë për Ndihmë Juridike Falas, si dhe pozitën e kryeinspektorit në Inspektoratin e Tregut.

Qeveria emëroi po ashtu komisionet e pranimit për pozitat e drejtorit ekzekutiv dhe të zëvendësdrejtorit të përgjithshëm në Agjencinë Shtetërore të Arkivave të Kosovës, si dhe për pozitën e sekretarit të përgjithshëm në Ministrinë e Shëndetësisë.