Qeveria kërkon dritën jeshile të Presidentes për kredinë e BEI-së për pajisjet mjekësore

Qeveria e Kosovës ka hapur rrugën për një marrëveshje kredie me Bankën Evropiane për Investime (BEI), të destinuar për përmirësimin e pajisjeve mjekësore dhe të infrastrukturës. Vendimi u mor në mbledhjen e gjashtë të kabinetit, e zhvilluar në format elektronik, me një pikë të vetme në rend dite.

Me këtë vendim, ekzekutivi i kërkon Presidentes së Republikës së Kosovës që t'i japë Ministrit të Financave autorizimin për ta nënshkruar marrëveshjen. Në njoftimin e Qeverisë thuhet se kabineti ka: "Miratuar vendimin për të kërkuar nga Presidentja e Republikës së Kosovës për dhënien e autorizimit Ministrit të Financave për nënshkrimin e Marrëveshjes së Kredisë ndërmjet Republikës së Kosovës dhe Bankës Evropiane për Investime për Projektin për Përmirësim të Pajisjeve Mjekësore dhe Infrastrukturës".

Shuma e kredisë dhe kushtet e saj nuk janë bërë të ditura. Mbledhja vjen rreth një muaj pas konfirmimit të Qeverisë, ndërsa nënshkrimi i marrëveshjes tani varet nga autorizimi i Presidentes.