Putin pranon: Sulmet me dronë të Ukrainës po dëmtojnë ekonominë ruse

Presidenti rus Vladimir Putin ka pranuar publikisht se sulmet ukrainase me dronë ndaj rafinerive dhe infrastrukturës së naftës po ndikojnë në ekonominë e Rusisë — një pohim i rrallë për dëmin e shkaktuar nga fushata e Kievit ndaj objekteve energjetike.

Putin foli në një mbledhje të Këshillit për Zhvillim Strategjik dhe Projekte Kombëtare në Moskë. Sipas tij, tabloja ekonomike mbetet pozitive, ndonëse e kufizuar: "Të dhënat statistikore tregojnë se performanca ekonomike, ndonëse modeste në përgjithësi, mbetet pozitive."

Ai e lidhi ngadalësimin e aktivitetit me presionin e jashtëm dhe me goditjet ndaj objekteve industriale. "Është e qartë se ritmi i aktivitetit ekonomik po ndikohet nga një sërë faktorësh, duke përfshirë presionin e jashtëm, si dhe sulmet terroriste ndaj objekteve industriale dhe të infrastrukturës. Natyrisht, sulme të tilla nuk kanë dhe nuk mund të rezultojnë në pasoja kritike. Megjithatë, ato na shkaktojnë dëm. Kjo është e qartë dhe ne e njohim dhe e kuptojmë plotësisht", tha Putin.

Deklarata shënon një pranim të drejtpërdrejtë nga vetë krerët e Kremlinit se goditjet ukrainase mbi zinxhirin e naftës po lënë gjurmë, edhe pse Putin këmbënguli se ato nuk mund të sjellin pasoja "kritike" për vendin.