ReklamëHapësirë reklame
ReklamëHapësirë reklame
Reklamë
Një nxënës 14 vjeç hyri në shkollën e tij në jug të Francës me një pushkë gjahu të fshehur në një këllëf kitare dhe qëlloi brenda godinës. Drejtori dhe një mësuese u plagosën në këmbë, ndërsa prokuroria e Marsejës ka hapur hetim për tentativa vrasjeje.
Ishte pak pas orës 9 të mëngjesit të së hënës, më 12 tetor, kur një nxënës 14-vjeçar hapi zjarr në korridorin e katit të parë të shkollës Joseph-Lakanal në Aubagne, në departamentin Bouches-du-Rhône të Francës. Në shënjestër mbetën drejtori i shkollës, 53 vjeç, dhe një mësuese 37-vjeçare, që ndodheshin në korridor.
Sipas prokurorisë së Marsejës, adoleshenti, nxënës i vitit të fundit në këtë shkollë, kishte hyrë në godinë me një pushkë gjahu të fshehur në një këllëf kitare. Ai qëlloi një ose dy herë në hapësirat e përbashkëta të katit të parë. "Të dy të goditur në gjymtyrët e poshtme, ata u transportuan në spital, pa qenë jeta e tyre në rrezik", thuhet në komunikatën e prokurorisë. Kryebashkiaku i qytetit, Jean-Pierre Squillari, tha se të dy të plagosurit u trajtuan si urgjenca relative. Prefektura e policisë së Bouches-du-Rhône raportoi gjithashtu se një person i tretë mori një gërvishtje të lehtë.
Të shtënat nuk u ndalën aty. Djaloshi u ngjit në katin e dytë dhe qëlloi edhe dy herë: njëherë përpara një mësueseje, me grykë drejt dyshemesë, dhe njëherë brenda një klase plot me nxënës. Plumbi goditi dërrasën e zezë. "Të dy mësueset, si dhe nxënësit, nuk u plagosën, por janë thellësisht të tronditur", sipas prokurorisë.
Ndërsa po zbriste shkallët, i riu u mbërthye nga një punonjës i shkollës, përpara se të arrestohej nga policia dhe të mbahej në arrest policor. Ministri francez i Brendshëm, Laurent Nuñez, deklaroi se edhe babai i të dyshuarit është vendosur në arrest policor dhe se po kryhen kontrolle.
Prokuroria e Marsejës ka hapur hetim për "tentativa vrasjeje", ndërsa çështja i është besuar brigadës kriminale. Motivi mbetet i panjohur. Zëvendësprokurorja tha: "Do të shqyrtohet një varg i tërë hipotezash (…) Na është folur ndoshta për ngacmim (…) E gjithë kjo do të analizohet dhe motivi, në këtë moment, ende nuk është përcaktuar". Prefekti i departamentit, Jacques Witkowski, theksoi se i dyshuari "nuk njihet për vepra delikuence, radikalizimi".
Kryebashkiaku Squillari e përshkroi të riun si "një djalë që ndjek mësimet në shkollë" dhe shtoi: "me sa duket fëmija është si gjithë të tjerët (…). Babai kishte kërkuar një takim me këshilltarin kryesor arsimor, por nuk dimë më shumë".
Ngjarja, e njoftuar fillimisht nga zyra e kryeministrit francez, solli në vendngjarje në mesditë tre anëtarë të qeverisë: Nuñez, ministrin e Arsimit Kombëtar, Edouard Geffray, dhe ministren e deleguar për arsimin, Sabrina Roubache. Ata u takuan me stafin arsimor dhe më pas me forcat që ndërhynë gjatë sulmit, duke falënderuar policinë, shërbimet e shpëtimit dhe personelin e shkollës.
"Erdhëm për të dëshmuar unitetin edhe të shoqërisë edhe të komunitetit arsimor rreth një ekipi që është jashtëzakonisht i sprovuar", tha Geffray. Ai e cilësoi ngjarjen "një akt kriminal [që] ka një jehonë shumë të veçantë për ne, pasi përkon me javën e përkujtimit të vrasjeve të [Dominique] Bernard dhe [Samuel] Paty".
Ministri përjashtoi çdo lidhje me protestat e nxënësve, duke siguruar se akti "nuk lidhet me bllokimin e gjimnazit". Megjithatë, ai foli për "një fenomen shoqëror global, ku kemi një dhunë të shfrenuar nga ana e disa të rinjve, veçanërisht kundër institucionit shkollor", duke shtuar se "shkolla nuk mund ta trajtojë dhunën e rëndë". Sipas tij, në këtë shkollë ishin kryer më parë kontrolle, dhe as një portë sigurie nuk do ta kishte parandaluar sulmin.
Në anën tjetër, presidentja e departamentit Bouches-du-Rhône, Martine Vassal, nga e djathta e moderuar, hodhi fajin mbi drejtuesit e mëparshëm: "Ekipi i mëparshëm i shkollës kishte refuzuar sigurimin e institucionit. Drejtori i ri na kishte kërkuar ta bënim". Ajo u zotua të vazhdojë me "sigurimin e rreth dhjetë shkollave që mbeten në departament, pavarësisht nëse drejtori i institucionit e do apo jo".
Të martën shkolla do të hapet vetëm për mësuesit. Nxënësit do të rikthehen të mërkurën, por, siç tha Geffray, "ndoshta jo për të bërë mësim (…) sepse kanë nevojë të flasin".
Gurë kalldrëmi të shkulur nga Parku Rinia, gaz lotsjellës dhe mbi 100 të arrestuar: protestat kundër qeverisë në Shqipëri hynë në ditën e shtatë pa asnjë shenjë qetësimi. Kryeministri Rama i quan pjesë të një sulmi të koordinuar, ndërsa protestuesit fajësojnë policinë për dhunën.
