Protestat në Shqipëri: 167 të arrestuar, 132 policë të dëmtuar, 7 efektivë të pezulluar

Shtatë punonjës të Policisë së Shtetit në Shqipëri janë hequr nga detyra dhe janë nën hetim disiplinor për mënyrën se si u trajtua një protestues. Ky është vetëm një nga zërat e një bilanci të rëndë: 167 shtetas të arrestuar, 388 të proceduar penalisht dhe 132 policë të dëmtuar gjatë ditëve të tubimeve.

Shifrat i bëri publike Drejtori i Përgjithshëm i Policisë së Shtetit, Skënder Hita, në një konferencë për mediat. Sipas tij, hetimi ndaj shtatë efektivëve nisi menjëherë dhe ka në fokus tejkalimin e detyrës, mosrespektimin e parimit të proporcionalitetit dhe trajtimin e një protestuesi nga ana e punonjësve të policisë.

Hita u përpoq të ndajë përgjegjësinë individuale nga ajo e institucionit. "Dua t’i siguroj qytetarët se asnjë punonjës policie nuk ka marrë urdhër, në asnjë moment dhe në asnjë rrethanë, për të vepruar në kundërshtim me procedurat standarde të punës", deklaroi ai, duke shtuar se "çdo rast i evidentuar i tejkalimit të kompetencave apo mosrespektimit të këtyre procedurave do të trajtohet sipas ligjit".

Drejtori i policisë mbrojti mjetet e përdorura në terren, duke i krahasuar me praktikat evropiane. "Gjatë tubimeve të dhunshme, ashtu si në vendet e Bashkimit Evropian, Policia e Shtetit përdor mjetet e përcaktuara nga legjislacioni dhe procedurat standarde të punës për garantimin e rendit dhe sigurisë, si dhe për mbrojtjen e punonjësve të Policisë", tha Hita. Sipas tij, efektivët janë instruktuar vazhdimisht që, kur ndërhyjnë apo mbrohen nga sulmet, të zbatojnë me rigorozitet procedurat dhe parimin e proporcionalitetit, ndërsa përdorimi i mjeteve bëhet në raport me shkallën e rrezikut.

Nga ana tjetër e barrikadës, sipas Hitës, policët janë goditur me gurë, pllaka guri, sende metalike, zare metalike të hedhura me llastikë, lëndë piroteknike dhe bomba molotov. Pjesa më e madhe e 132 punonjësve të dëmtuar u plagos në Tiranë, por ka të dëmtuar edhe në Shkodër dhe Lezhë. Disa prej tyre ende po marrin ndihmë mjekësore në spital.

Pjesa më shqetësuese e deklaratës lidhej me atë që po ndodh në internet. Hita tha se në rrjetet sociale, kryesisht në grupe të hapura së fundmi në Telegram, po bëhen thirrje të vazhdueshme për dhunë ndaj policëve. Sipas të dhënave që disponohen në kuadër të hetimeve penale, këto thirrje synojnë nxitjen e sulmeve me çdo mjet, përfshirë lëndë djegëse dhe plasëse. Vetëm gjatë paradites së ditës së konferencës, sipas tij, në këto grupe u publikuan thirrje që protestuesit e maskuar të sigurojnë mjete për të sulmuar policinë dhe për t’u vënë zjarrin automjeteve të saj.

Policia e Shtetit, tha Hita, ka marrë masa për identifikimin dhe kapjen e personave të përfshirë në këto veprime, si dhe "për t’iu përgjigjur çdo akti kriminal me forcën e ligjit, në mbrojtje të punonjësve të Policisë, institucioneve shtetërore dhe pronës publike e private".