Protesta e 1 tetorit kundër vendimit të Speciales: pa marsh, me folës e thirrje për paqe

Sheshi “Skënderbeu” në Prishtinë pritet të mbushet më 1 tetor me protestues që kundërshtojnë vendimin e Gjykatës Speciale ndaj ish-krerëve të Ushtrisë Çlirimtare të Kosovës. Kësaj radhe nuk do të ketë marsh nëpër qytet: qytetarët do të mblidhen në një vend dhe tubimi pritet të zgjasë rreth një orë deri në një orë e gjysmë.

Protestën gjithëpopullore e ka paralajmëruar platforma “Liria ka Emër”. Ismail Tasholli, nga kjo platformë, tha në një intervistë për Ekonomia Online se ftesa nuk ka përjashtime dhe se në shesh presin edhe liderët politikë.

“Po. Ne u kemi dërguar ftesë krejt qytetarëve të Kosovës, edhe krerët e partive janë qytetarë të Kosovës, gjithsesi që duhet të jenë të pranishëm për me e përçuar një mesazh të rëndësishëm siç është ‘Jo në emrin tim’”, tha Tasholli.

I pyetur nëse ndonjë parti politike e ka konfirmuar pjesëmarrjen, ai u përgjigj se konfirmime të tilla nuk kërkohen, por shprehu bindjen se përfaqësuesit politikë do të jenë aty. “Zakonisht konfirmimet për pjesëmarrje fizike në shesh nuk i kemi kurrë, sepse janë absurde në vete, por me siguri që do të jenë sepse edhe ata janë qytetarë të këtij vendi, kësaj toke”, deklaroi ai.

Organizimi do të shtrihet përtej kryeqytetit. Sipas Tashollit, do të publikohen pikat e takimit dhe të grumbullimit për qytetarët që do të vijnë me autobusë, ndërsa çdo komunë e di tashmë nga do të niset. “Po, piktakimet, grumbullimet me autobus besoj që i publikojmë. Mandej secila komunë e din pikënisjen, pikëgrumbullimin. Këtu për dallim prej herëve të tjera nuk do të jetë marsh, do të jetë protestë edhe do të mblidhemi në sheshin ‘Skënderbeu’. Krejt ai organizim, nuk e di sa do të zgjasë, përafërsisht një orë, një orë e gjysmë”, tha ai.

Në skenë pritet të dalin pesë deri në gjashtë folës: fëmijë të dëshmorëve, njerëz që morën pjesë në protestat e 1 tetorit 1997, studentë dhe përfaqësues të organizatave të veteranëve. “Do të jenë pesë-gjashtë folës të prejardhjeve të ndryshme në kuptimin e asaj se çka prezantojnë. Janë fëmijë të dëshmorëve, janë njerëz që kanë qenë pjesë edhe në 97-ën në 1 tetorin e famshëm, ka edhe zë prej studentëve. Me siguri do të jetë edhe dikush prej organizatave të veteranëve. Dhe kjo është pak a shumë dhe do ta mbyllim edhe me pikë muzikore, zakonisht me ndonjë këngë patriotike”, u shpreh Tasholli.

Për sigurinë e tubimit, ai ishte kategorik: të gjitha organizimet e platformës janë paqësore, dhe qytetarët janë ftuar të vijnë me familjet. “Gjithsesi. Krejt organizimet tona janë paqësore. Ne u bëjmë thirrje zakonisht që të vijnë me fëmijë, me pleq, të gjithë qytetarët e Kosovës, sepse vetëm në këtë mënyrë mund ta përçojmë një mesazh paqësor, gjithsesi”, tha ai.

Në qendër të pakënaqësisë është vendimi me të cilin Gjykata Speciale i dënoi katër ish-krerë të UÇK-së me gjithsej 81 vjet burgim. Ish-presidenti i Kosovës, Hashim Thaçi, u dënua me 25 vjet burgim, pasi gjykata e shpalli përgjegjës për krime që përfshijnë vrasje, torturë, trajtim mizor dhe ndalim të paligjshëm gjatë luftës në Kosovë. Jakup Krasniqi mori po ashtu 25 vjet, Kadri Veseli 18 vjet dhe Rexhep Selimi 13 vjet, të tre të shpallur fajtorë për krime lufte, ndër to trajtim mizor, torturë dhe vrasje e paligjshme, ndërsa Veseli dhe Krasniqi edhe për ndalim arbitrar.