Mbrojtja e Thaçit akuzon Specialen: Na ndaluat të flasim, pastaj e publikuat vetë

Çështja e Behajdin Allaqit, emri i të cilit u përmend në ditën e shpalljes së aktgjykimit nga Dhomat e Specializuara të Kosovës, është kthyer në një nga pikat e ashpra të kritikës së mbrojtjes ndaj gjykatës.

Pierre Richard Prosper, avokat i ekipit mbrojtës të ish-presidentit të Kosovës, Hashim Thaçi, ka thënë në një intervistë për emisionin "Rubikon" në Klan Kosova se e gjithë tematika që lidhej me këtë rast ishte trajtuar si konfidenciale nga fillimi deri në fund të procedurës, duke e lënë mbrojtjen pa mundësi të fliste publikisht.

"Gjatë gjithë procedurës çështjet që kishin të bënin me këtë ngjarje janë mbajtur konfidenciale, sekrete nga publiku. Dhe mund ta them, në këtë proces ne kishim shumë informata të mira, pyetje kryqëzore lidhur me këtë çështje që kishin të bënin me mbrojtjen dhe nuk na është lejuar të diskutonim", ka thënë Prosper.

Sipas tij, nuk kishte pasur as urdhër dhe as vendim të tribunalit që do t'i bënte publike këto ngjarje apo rrethanat. Ky, thotë avokati, është edhe thelbi i kundërshtimit: informacioni doli në publik pa kontekstin e tij.

"Por në ditën kur publikohet aktgjykimi, gjykata vendos se është e rëndësishme që të shpallet kjo informatë, të bëhet publike pa informatat e tjera bazë për njerëzit", është shprehur ai.

Prosper e lidh këtë me atë që e konsideron si problem të motivimit të vetë procesit. "Prapë kjo është diçka tjetër problematike dhe i kthehet pikës sime lidhur me motivimin, i kthehet pikës se ky aktgjykim është përfaqësimi i pandershëm i sundimit të ligjit dhe drejtësisë", ka deklaruar avokati i mbrojtjes.

Nga ana e Dhomave të Specializuara të Kosovës nuk ka një përgjigje publike ndaj këtyre pretendimeve.