Prokuroria Speciale kërkon paraburgim për nëntë të dyshuar për vrasjen e 23 civilëve

Prokuroria Speciale e Republikës së Kosovës kërkon që nëntë të dyshuarit për krime lufte në Zubin Potok të mbeten pas hekurave. Kërkesa për caktimin e masës së paraburgimit u paraqit në Gjykatën Themelore në Prishtinë, Departamenti Special, për veprën penale "Krime lufte kundër popullsisë civile".

Kërkesa përfshin personat me inicialet D.D., M.R., M.R., R.R., S.D., S.D., V.L., R.R. dhe D.D. Sipas dyshimeve të prokurorisë, ata kanë marrë pjesë në vrasjen dhe zhdukjen e 23 civilëve në Zubin Potok, komunë në veri të Kosovës me shumicë serbe.

Të nëntët u arrestuan në orët e hershme të mëngjesit të 27 shtatorit, në operacionin e koduar "Dosja 23", të kryer nga Policia e Kosovës me urdhër të Prokurorisë Speciale dhe të lidhur me rastin e njohur si "Grupi i Intelektualëve".

Prokuroria thotë se kërkesa mbështetet në provat dhe të dhënat e mbledhura gjatë procedurës hetimore deri në këtë fazë. Gjykata ende nuk ka vendosur nëse do t'i mbajë të dyshuarit në paraburgim.

Hetimi nuk ndalet këtu. "Prokuroria Speciale do të vazhdojë veprimet hetimore dhe procedurat në kuadër të kompetencave të saj ligjore, duke respektuar të drejtat e të gjithë personave të përfshirë në procedurë dhe konfidencialitetin e informacionit që nuk mund të bëhet publik në këtë fazë", thuhet në njoftimin e prokurorisë.