Procesorë, pllaka amë dhe monitorë për lojëra të padeklaruar sekuestrohen në Merdare

Pajisje elektronike me vlerë të përafërt prej rreth 10 mijë eurosh janë sekuestruar në Pikën e Kalimit Kufitar në Merdare, në një rast që Dogana e Kosovës e cilëson si tentim për futjen e mallrave të padeklaruara në vend.

Rasti u zbulua më 3 tetor gjatë kontrolleve në hyrje të kufirit, në një aksion të përbashkët të Doganës me Policinë e Kosovës. Zyrtarët doganorë gjetën dhe sekuestruan procesorë, pllaka amë, kufje, USB, maus, mikrofona, kabllo dhe pesë sete monitorësh për lojëra.

Identiteti i personit apo personave që tentuan ta fusnin mallin nuk është bërë publik, as nuk dihet nëse ndaj tyre janë ndërmarrë masa të tjera.

Dogana ka njoftuar se bashkëpunimi me Policinë e Kosovës do të vazhdojë në luftën kundër kontrabandës dhe në parandalimin e shkeljeve doganore.