Prizren: e mitura e raportuar e zhdukur paraqitet pas dy ditësh me 22-vjeçarin

Kërkimet e një familjeje në Prizren për vajzën e tyre 15-vjeçare morën fund më 16 shtator, rreth orës 19:00, kur e mitura u paraqit në Stacionin Policor në Prizren, e shoqëruar nga një 22-vjeçar. Pas bashkëbisedimit me të, rasti u iniciua për veprën penale "Dhunim".

Gjithçka kishte nisur dy ditë më parë. Më 14 shtator, rreth orës 19:00, nëna e vajzës kishte shkuar në të njëjtin stacion policor dhe kishte raportuar se e bija ishte larguar nga shtëpia po atë ditë, rreth orës 09:30. Familjarët e kishin kërkuar në disa lokacione, por nuk kishin arritur as ta gjenin, as të komunikonin me të. Rasti u regjistrua fillimisht si "Person i zhdukur" dhe në hetime u përfshinë edhe hetuesët rajonalë.

Me të miturën është bashkëbiseduar në praninë e nënës së saj dhe të një punëtori social. Ajo ka deklaruar se, gjatë kohës që kishte qenë me të dyshuarin, ai e kishte puthur dhe prekur në pjesë të ndryshme të trupit.

I dyshuari, i identifikuar me inicialet A.S., 22 vjeç, është intervistuar në praninë e avokatit mbrojtës. Ai ka pranuar se për dy ditë kishte qëndruar me të miturën në një shtëpi të familjarëve të tij.

Prokurorja kujdestare, e njoftuar për rastin, ka urdhëruar ndalimin e të dyshuarit për 48 orë. E mitura është dërguar përkohësisht në një strehimore dhe më pas do të dërgohet në Institutin e Mjekësisë Ligjore në Prishtinë për ekzaminim. Në konsultim me prokuroren kujdestare, procedura penale u nis për veprën "Dhunim".

Hetimet do të vazhdojnë nga Sektori Rajonal i Hetimeve në Prizren. I dyshuari prezumohet i pafajshëm derisa fajësia të provohet me vendim të formës së prerë nga gjykata.