Prizren: 70-vjeçari gjendet i vdekur në rrugë, policia dyshon për vdekje natyrore

Një burrë rreth 70-vjeçar është gjetur pa shenja jete në një rrugë në Prizren, ka konfirmuar zëdhënësi i Policisë për rajonin e Prizrenit, Shaqir Bytyqi.

Sipas tij, njësitet policore kanë dalë menjëherë në vendin e ngjarjes, ku kanë nisur hetimet. Dyshimet e para të policisë janë se vdekja ka ndodhur për shkaqe natyrore, megjithëse askush nuk e ka përjashtuar ende ndonjë rrethanë tjetër.

"Policia ka dalë në vendin e ngjarjes dhe po zhvillohen hetimet. Është gjetur pa shenja jete, personi është i moshës 70-vjeçare. Besohet se vdekja është natyrore. Mbetet të shihet se çka do të dalë më pas nga ky rast", deklaroi Bytyqi.

Identiteti i të ndjerit dhe ora kur u gjet nuk janë bërë publike. Policia po vazhdon të merret me rastin, ndërsa rrethanat e plota të vdekjes pritet të sqarohen pas përfundimit të hetimeve.