Prishtina voton lokacionet: 71% e Lojërave Mesdhetare 2030 do të zhvillohen në kryeqytet

Fshati Olimpik, një Qendër Multisportive, Vertical Gym, Unaza e Qytetit, një rrjet parkingjesh nëntokësore, Parku Botanik dhe projektet në Gollak: këto janë objektet për të cilat Kuvendi i Kryeqytetit ka votuar lokacionet, si pjesë e përgatitjeve për Lojërat Mesdhetare "Prishtina 2030".

Vendimin e ka bërë të ditur kryetari i Prishtinës, Përparim Rama, përmes një postimi në Facebook. Sipas tij, votimi është zhvilluar të premten në Kuvendin e Kryeqytetit dhe vendimet janë marrë në përputhje me Masterplanin e aprovuar për organizimin e Lojërave.

"Prishtina i fitoi Lojërat Mesdhetare 'Prishtina 2030'. Lokacionet u votuan në Asamblenë e Kryeqytetit. Prishtina është gati! Historia po shkruhet!", ka shkruar Rama.

Pesha e organizimit bie kryesisht mbi kryeqytetin. "Sipas Masterplanit të aprovuar, 71% e Lojërave Mesdhetare 2030 do të zhvillohen në Prishtinë, prandaj projektet si Fshati Olimpik, Qendra Multisportive, Vertical Gym, Unaza e Qytetit, rrjeti i parkingjeve nëntokësore, Parku Botanik, Gollaku janë pjesë e transformimit të madh të Kryeqytetit që do t'u shërbejë gjeneratave edhe shumë kohë pas përfundimit të Lojërave", ka deklaruar kryetari, i cili këmbëngul se investimet duhet të mbeten të përdorshme edhe pas ngjarjes.

Rama ka falënderuar përfaqësuesin e Ambasadës së SHBA-së, Patrick Gan, përfaqësuesin e KUSA-s, si dhe asamblistët që votuan për këto vendime.

Afati, sipas tij, është i ngushtë. "Tash kemi më pak se katër vjet. Çdo ditë ka rëndësi. Në 2030 organizojmë Lojërat. Për dekada pas tyre, Prishtina jeton me atë që ndërtojmë sot", ka thënë Rama.

Lojërat Mesdhetare "Prishtina 2030" pritet të jenë një nga ngjarjet më të mëdha sportive ndërkombëtare të organizuara ndonjëherë në Kosovë, me kryeqytetin si qendër kryesore të garave. Organizimi ka nxitur diskutime të vazhdueshme për ndërtimin e infrastrukturës sportive dhe të projekteve përcjellëse që synohet të shfrytëzohen edhe pas vitit 2030. Numri i votave dhe vlera financiare e projekteve nuk janë bërë publike.