Prishtina i përgjigjet Kievit: Solidariteti me Ukrainën nuk ka qenë kurrë transaksion

Në pritjen e organizuar nga Presidenca në shënim të 35-vjetorit të shpalljes së pavarësisë së Ukrainës, më 24 gusht 2026, kryeministri në detyrë i Kosovës, Albin Kurti, e nisi me një fjali të shkurtër: "Qëndrimi i Kosovës për Ukrainën nuk ka ndryshuar". Deklarata vjen dy javë pas fjalëve të presidentit ukrainas nga Beogradi, se mosnjohja e Kosovës nga Kievi mbetet e pandryshuar.

Sipas Kurtit, qëndrimi i Kosovës ka qenë i njëjtë që nga dita e parë dhe solidariteti me Ukrainën nuk ka qenë kurrë transaksion. Ai e adresoi drejtpërdrejt mospajtimin me Kievin.

"Ne jemi të vetëdijshëm se Kievi ende nuk e njeh pavarësinë e Republikës së Kosovës dhe ky qëndrim u përsërit para dy javësh. Ne besojmë se ai qëndrim nuk qëndron as para fakteve historike, as para të drejtës ndërkombëtare dhe do ta themi këtë sa herë të jetë nevoja, njëjtë siç e mirëpresim njohjen e pavarësisë nga Ukraina dhe çdo shtet tjetër liridashës e paqedashës që ende nuk e ka njohur Republikën e Kosovës", tha Kurti.

Kryeministri në detyrë vlerësoi se Kosova dhe populli shqiptar qëndrojnë jo vetëm në vendin e tyre, por edhe në të drejtën e tyre historike. Duke iu referuar vitit 1991, ai tha se parlamenti ukrainas votoi atëherë aktin që ia ktheu popullit të vet të drejtën për të vendosur vetë për fatin e tij, ndërsa për më se katër vjet Ukraina është detyruar ta mbrojë atë të drejtë me armë në dorë, sepse Federata Ruse vendosi ta zhbëjë me forcë.

Në të njëjtin aktivitet, ushtruesja e detyrës së presidentes së Kosovës, Albulena Haxhiu, priti gazetarët ukrainas që po qëndrojnë në Kosovë dhe deklaroi se vendi do të vazhdojë ta mbështesë Ukrainën në luftën kundër agresionit rus.

"E kemi bërë këtë sepse besojmë fort në të drejtën e Ukrainës që ta zgjedhë vetë të ardhmen e saj, ta mbrojë tokën e vet dhe po ashtu që populli ukrainas të jetojë i lirë. Këtë mbështetje jemi përpjekur ta bëjmë edhe konkrete. Kosova ka ndërmarrë shumë veprime në këtë drejtim. Ka vendosur sanksione ndaj Rusisë menjëherë pas fillimit të agresionit rus dhe ka vazhduar të harmonizohet me partnerët tanë evropianë dhe transatlantikë. Kemi mirëpritur gazetarë ukrainas, kemi pezulluar përkohësisht regjimin e vizave për qytetarët e Ukrainës dhe jemi përgatitur të presim njerëz që janë të detyruar t'i lënë shtëpitë e tyre për shkak të luftës", deklaroi Haxhiu.

Ajo përmendi edhe dimensionin ushtarak të kësaj mbështetjeje: "Jemi pjesë e Grupit të Kontaktit për Mbrojtjen e Ukrainës, pjesëtarë të Forcës së Sigurisë së Kosovës kanë marrë pjesë në trajnimin e ushtarakëve ukrainas, përfshirë edhe në kuadër të operacionit 'Interflex'". Sipas saj, dy pakot e ndihmës ushtarake të dërguara nga Kosova përfshijnë 30 automjete ushtarake dhe 10 mijë predha mortajash.

Për praninë e gazetarëve ukrainas në Kosovë, Haxhiu tha se ajo ka një rëndësi të veçantë, pasi vendi e di nga përvoja e vet se sa peshë ka dokumentimi i luftës. "Gjatë luftës sonë e kuptuam sa e rëndësishme ishte që dikush ta dokumentonte atë që po ndodhte dhe të sigurohej që bota ta shihte", tha ajo. Haxhiu u shpreh se Kosova dëshiron një paqe për Ukrainën që garanton pavarësinë, sovranitetin dhe tërësinë territoriale të saj, si dhe të drejtën e popullit ukrainas për të vendosur vetë për të ardhmen.