Prishtina ftohet të udhëheqë rrjetin B40 të qyteteve të Ballkanit në 2027

Prishtina është ftuar zyrtarisht ta marrë Presidencën e B40 Balkan Cities Network, rrjetin e qyteteve të Ballkanit, për vitin 2027. Ftesa ka ardhur nga kryetari i Zagrebit dhe presidenti aktual i B40, Tomislav Tomašević.

Lajmin e bëri të ditur kryetari i Prishtinës, Përparim Rama, në një njoftim. Sipas tij, kryeqyteti do të presë edhe Samitin e B40 në janar të vitit të ardhshëm, pa u bërë e njohur data e saktë e mbledhjes.

Në letrën zyrtare, mbështetjen për Prishtinën për marrjen e Presidencës e ka shprehur edhe Qyteti i Sarajevës. Rama e ka cilësuar zhvillimin si vlerësim për rolin gjithnjë e më të rëndësishëm të Prishtinës në rajon dhe si mundësi për ta shndërruar kryeqytetin në platformë të dialogut, bashkëpunimit dhe zhvillimit ndërmjet qyteteve të Ballkanit.

"Një tjetër përgjegjësi e rëndësishme ndërkombëtare për Kryeqytetin tonë. Me ftesë zyrtare nga Kryetari i Zagrebit dhe Presidenti aktual i B40, Tomislav Tomašević, Prishtina është ftuar ta marrë Presidencën e B40 Balkan Cities Network për vitin 2027, ndërsa Samiti B40 do të mbahet në Prishtinë në janar të vitit të ardhshëm. Ky është vlerësim për rolin gjithnjë e më të rëndësishëm të Prishtinës në rajon, por edhe mundësi për ta shndërruar Kryeqytetin në një platformë të dialogut, bashkëpunimit dhe zhvillimit ndërmjet qyteteve të Ballkanit. Në letrën zyrtare, edhe Qyteti i Sarajevës ka shprehur mbështetjen e tij për Prishtinën për marrjen e Presidencës, duke vlerësuar lidershipin dhe orientimin tonë drejt gjithëpërfshirjes, partneritetit dhe vizionit evropian. Në 2027, Prishtina nuk do të jetë vetëm pjesë e tavolinës së qyteteve të Ballkanit, do ta udhëheqë atë. Prishtina po rritet. Po lidhet. Po udhëheq", shkroi Rama.