Prishtina 2030 nën presion: Qeveria ka afat deri të mërkurën për t'iu përgjigjur ICMG-së

Qeveria e Kosovës ka kohë deri nesër, të mërkurën, për t'i kthyer përgjigje Komitetit Ndërkombëtar të Lojërave Mesdhetare (ICMG), i cili ka adresuar vërejtje për hapat që duhet të ndërmerren në funksion të organizimit të Lojërave Mesdhetare Prishtina 2030.

Afati u vendos sot në një takim urgjent mes ministrit të Rinisë dhe Sportit, Blerim Gashani, dhe drejtuesve të Komitetit Olimpik të Kosovës (KOK). Sipas informacioneve të agjencisë KosovaPress, në tryezë u diskutua për situatën e krijuar dhe për veprimet që duhet të ndërmerren në vazhdim.

Shqetësimet e ICMG-së dolën publikisht pasi kryetari i Prishtinës, Përparim Rama, publikoi letrën e komitetit, e cila ngre pikëpyetje për përmbushjen e hapave dhe të obligimeve financiare që lidhen me organizimin e ngjarjes.

Përgjigjja e Qeverisë dhe hapat që do të pasojnë priten të jenë ndër elementet kryesore para 19 dhjetorit, kur ICMG-ja mbledh takimin e radhës. Aty do të shqyrtohet ecuria e përgatitjeve dhe do të diskutohet konkretisht për të ardhmen e Lojërave Mesdhetare në Kosovë.