Princi saudit Naif bin Abdullah pritet në Prishtinë, Rama flet për investime të reja

Një pjesëtar i familjes mbretërore saudite ka qëndruar në Prishtinë. Kryetari i kryeqytetit, Përparim Rama, njoftoi se në Odën e Kryeqytetit priti princin Naif bin Abdullah bin Saud bin Abdulaziz Al Saud, nga dinastia Al Saud, i shoqëruar nga delegacioni i tij dhe nga investitorë potencialë ndërkombëtarë.

Lajmin për takimin e bëri publik vetë Rama përmes një postimi në profilin e tij në Facebook. Ai e paraqiti vizitën si një mundësi për të krijuar lidhje të reja ndërkombëtare dhe për të promovuar potencialin e Prishtinës për investime e zhvillim ekonomik.

Në të njëjtin postim, kryetari i Prishtinës falënderoi Arianit Shehun dhe kompaninë Strategic Group për angazhimin dhe rolin e tyre në krijimin e kontakteve që, sipas tij, e lidhin kryeqytetin me mundësi të reja ndërkombëtare. Rama shkroi se potenciali i qytetit po nxirret përtej kufijve dhe se po ndërtohen partneritete që idetë e mëdha t'i kthejnë në zhvillim real.

Nuk është bërë e ditur nëse nga takimi ka dalë ndonjë marrëveshje apo projekt konkret investimi.