Pranga për të dyshuarin që u shtir si toger policie dhe mori 450 euro për pelet

Policia e Kosovës ka arrestuar burrin e dyshuar se u paraqit në telefon si toger policie dhe i mori një gruaje në Fushë Kosovë 450 euro, gjoja për blerjen e peletit. Me vendim të prokurorit, ai është dërguar në mbajtje.

Njësitet policore e identifikuan, e ndaluan dhe e arrestuan të dyshuarin, duke i sekuestruar edhe veturën që, sipas policisë, po e keqpërdorte. Bëhet fjalë për një automjet që ai e kishte marrë me qira disa ditë më parë në Gjilan dhe që nuk ia kishte kthyer pronarit, i cili tani figuron si ankues në të njëjtin rast.

Sipas raportit të policisë, skema nisi me një telefonatë. Duke u prezantuar si zyrtar me gradën toger, i dyshuari i kërkoi gruas që t'i dorëzonte një personi tjetër 450 euro, të cilat, sipas tij, do të shkonin për pelet. Gruaja, duke rënë në lajthitje, ia dha paratë, ndërsa ai u largua në drejtim të panjohur me veturën me qira.

Rasti ndodhi të enjten, në orën 15:55, në rrugën Dardania në Fushë Kosovë. Sipas policisë, viktima e ka raportuar ngjarjen më 16 tetor 2026. Nuk është bërë e ditur nëse paratë i janë kthyer gruas.