Presidenti i Cornell thyen heshtjen: përdhunimi i dyshuar në grup, "thellësisht shqetësues"

"Më dhemb zemra kur mendoj për atë që ajo përjetoi", tha të shtunën Michael Kotlikoff, presidenti i Universitetit Cornell, në mesazhin e tij të parë të gjerë publik pas skandalit që ka tronditur kampusin: përdhunimi i dyshuar në grup i një studenteje në një shtëpi të një vëllazërie studentore në vitin 2024.

Në një mesazh video tetëminutësh drejtuar komunitetit të universitetit, Kotlikoff e cilësoi rastin "thellësisht shqetësues" dhe paralajmëroi se ai do ta rëndojë Cornell-in për vite me radhë. Javën e fundit ai e përshkroi si një nga më të vështirat në historinë e institucionit. "Kjo ngre çështje prekëse dhe shqetësuese për dhunën seksuale, çnjerëzimin dhe aspekte të kulturës së festave, të përdorimit të alkoolit dhe drogës", tha ai.

Presidenti pranoi se pas akuzave kanë dalë pyetje shqetësuese për hetimet që pasuan. "Dua të pranoj diçka që mund të jetë e vështirë për një institucion ta thotë", deklaroi ai. "Nuk i kemi të gjitha përgjigjet, por jemi të përkushtuar të hetojmë dhe të gjejmë përgjigjet që komuniteti ynë meriton."

Presioni mbi universitetin është rritur ndjeshëm këto ditë. Gruaja, e identifikuar në dokumentet gjyqësore si Jane Doe, pretendon se u sulmua seksualisht nga disa anëtarë të vëllazërisë dhe ka paditur universitetin dhe shtatë ish-studentë. Raportohet gjithashtu se prokurori i qarkut nuk i kishte shqyrtuar deklaratat e dëshmitarëve dhe prova të tjera të mbledhura nga policia e Cornell-it.

Guvernatorja e Nju Jorkut, Kathy Hochul, ka marrë tashmë masa. Ajo caktoi prokuroren e përgjithshme të shtetit, Letitia James, si prokurore speciale për ta marrë në dorë hetimin penal, duke shprehur pakënaqësinë e saj me prokurorinë e Qarkut Tompkins. Hochul ka kërkuar edhe një shqyrtim të pavarur të mënyrës si e trajtoi universiteti rastin. Kotlikoff tha se e mbështet si këtë shqyrtim, detajet e të cilit do t'i bëjë publike Bordi i Administratorëve javën e ardhshme, ashtu edhe vendimin për kalimin e hetimit penal te prokurorja e përgjithshme.

Në kampus, zemërimi është i dukshëm. Gjatë një seance të asamblesë studentore të enjten, e organizuar që studentët të shprehnin shqetësimet dhe të diskutonin propozime për përmirësimin e reagimit të Cornell-it ndaj dhunës seksuale, disa folës kërkuan dorëheqjen e Kotlikoff-it. E pyetur në një konferencë për shtyp të premten nëse presidenti duhet të largohet, Hochul nuk mori qëndrim, duke thënë se ende nuk kishte informacion të mjaftueshëm.

Kotlikoff e pranoi zhgënjimin se universiteti nuk ka komunikuar sa duhet dhe tha se kjo ka ushqyer mosbesimin. Megjithatë, ai përmendi "kufizime reale ligjore dhe të privatësisë" mbi atë që institucioni mund të bëjë publike.

Rasti ka rikthyer në qendër të vëmendjes një ligj të shtetit të Nju Jorkut që e bën të vështirë ndjekjen penale të sulmeve seksuale kur viktima ka konsumuar vullnetarisht alkool ose drogë, edhe nëse ishte aq e dehur sa nuk mund të jepte pëlqimin. Prokurori i Qarkut Tompkins, Matthew Van Houten, iu referua pikërisht këtij ligji kur mbrojti vendimin e tij fillestar për të mos ngritur akuza, duke thënë se deklarata e parë e gruas në polici përshkruante përdorim vullnetar droge dhe aktivitet seksual. Kritikët prej kohësh kërkojnë mbylljen e asaj që e quajnë "boshllëku i dehjes vullnetare", ndërsa Hochul është zotuar se do të shtyjë ndryshimin e ligjit. Kotlikoff premtoi mbështetjen e Cornell-it për përpjekjet legjislative në këtë drejtim.