ReklamëHapësirë reklame
ReklamëHapësirë reklame
Reklamë
I akuzuari për sulmin me thikë në rrugën "Artim Jashari" në Mitrovicë të Jugut pranoi para gjykatës se veprimi ka ndodhur, por mohon se ishte tentim për të vrarë. Mbrojtja kërkon që ai të dalë nga paraburgimi dhe të kalojë në arrest shtëpiak.
"E pranoj veprimin të cilin e kam bërë, mirëpo nuk pajtohem me kualifikimin juridik të cilin e ka bërë Prokuroria, pra, rrjedhimisht, nuk e pranoj fajësinë në tërësi sipas aktakuzës." Me këto fjalë B.R., i akuzuar për vrasje në tentativë ndaj B.M. në Mitrovicë të Jugut, u paraqit të mërkurën para Gjykatës Themelore në Mitrovicë.
Fillimisht, kur iu kërkua të deklarohej, ai u përgjigj shkurt: "Qashtu qysh tha avokati". Pak më parë, avokati i tij mbrojtës kishte përcaktuar vijën e mbrojtjes: "Ne jemi të gatshëm ta pranojmë se veprimi ka ndodhur, por jo kualifikimin".
Prokuroria Themelore në Mitrovicë e ngarkon B.R. me veprën penale "Vrasje në tentativë", nga neni 172, lidhur me nenin 28 të Kodit Penal të Kosovës.
Nata e 18 korrikut sipas aktakuzës
Sipas aktakuzës që prokurorja e çështjes e paraqiti në seancë, ngjarja ndodhi më 18 korrik 2026, rreth orës 01:25 pas mesnatës, në rrugën "Artim Jashari" në Mitrovicë të Jugut. I dëmtuari ishte me motoçikletën e tij, ndërsa para tij lëviznin me veturë dy dëshmitarët, A.M. dhe E.I. Rrugës ata kaluan pranë sallonit të ondulimit "Resa".
Prokuroria pretendon se i dëmtuari u kthye mbrapsht me motoçikletë pasi dëgjoi të pandehurin ta thërriste disa herë "hej, hej". I pandehuri i doli përpara dhe motoçiklisti u detyrua të ndalej që të mos e godiste. Aty, sipas aktakuzës, i akuzuari nxori thikën që e mbante në dorën e djathtë dhe e qëlloi fillimisht në kokë. I dëmtuari ra nga motoçikleta, ndërsa goditjet vazhduan në pjesën e brinjëve, në anën e majtë dhe prapa kraharorit.
Kur i dëmtuari u ngrit në këmbë, pranë tij erdhi dëshmitari A.M. për të parë çfarë kishte ndodhur. Sipas prokurorisë, i dëmtuari i tha "ik se ka thikë" dhe të dy ia mbathën me vrap. I pandehuri, me thikë në dorë, i ndoqi deri te lapidari "Artim Jashari", duke u thënë, sipas aktakuzës, "jemi në bela, kom me ju vra tanve kallash".
Lëndime të rrezikshme për jetën
Prokuroria thotë se i dëmtuari pësoi lëndime të rënda trupore, të rrezikshme për jetën nga momenti i shkaktimit deri në dhënien e ndihmës së parë mjekësore. Sipas aktakuzës, ai mori plagë prerëse në tëmthin e majtë të kokës, plagë gërvishtëse mbi shpatullën e majtë, plagë prerëse-shpuese në shpatullën e majtë, si dhe iu konstatua prania e lëngut dhe gjakut në hapësirën e lirë të anës së majtë të kraharorit.
Sipas Policisë së Kosovës, viktima fillimisht u trajtua në Spitalin Rajonal të Mitrovicës, e më pas u transferua në QKUK. Gjatë ekzaminimit të vendit të ngjarjes policia sekuestroi një thikë që dyshohet se është përdorur në sulm.
Beteja për paraburgimin
Në qendër të seancës ishte edhe masa e sigurisë. Avokati mbrojtës i kujtoi gjykatës se klienti i tij ndodhet në paraburgim prej gati tre muajsh e gjysmë dhe se vendimin për vazhdimin e kësaj mase e kishte marrë dy ditë më parë.
"Veprimin nuk e kemi mohuar, por kualifikimin juridik. Unë jam i bindur se ju dini më mirë se unë, se gjykatësi nuk është i lidhur me kualifikimin juridik të prokurorit", tha ai, duke i kërkuar trupit gjykues "që masa e paraburgimit të ndërrohet me arrest shtëpiak". Sipas tij, i mbrojturi "gjithmonë ka me e respektu këtë masë dhe gjithmonë ka me iu përgjigjur thirrjeve tuaja dhe të Prokurorisë".
Kryetari i trupit gjykues sqaroi se më 15 tetor 2026 gjykata kishte vendosur t'ia vazhdonte të akuzuarit paraburgimin për dy muaj. "Ndërsa, siç e pohoi edhe mbrojtësi, dje, më datën 20.10.2026, kemi pranuar ankesë nga mbrojtësi këtu prezent ndaj këtij vendimi, ashtu që gjykata do të veprojë sipas kësaj ankese dhe lëndën në tërësi do ta dërgojë për vlerësim në Gjykatën e Apelit të Kosovës", deklaroi ai.
Gjykata ende nuk ka vendosur për kërkesën për arrest shtëpiak. Fjalën për paraburgimin tani e ka Gjykata e Apelit, ndërsa B.R. konsiderohet i pafajshëm deri në një vendim të formës së prerë.
Autoritarizmi nuk është më trend kalimtar, por diçka e rrënjosur thellë, paralajmëron raporti i ri global për sundimin e ligjit. Kosova nuk i shpëton rënies: humb rreth 1 për qind dhe shënon tkurrje në dy liri themelore.
