Postimi për "plumbin" ndaj Gërvallës çon në ndalim: 32-vjeçari kalon në duart e prokurorisë

Disa fjalë të shkruara në një profil Facebook kanë përfunduar me një ndalim 48-orësh në Prishtinë. Një 32-vjeçar dyshohet se, përmes një postimi në rrjetin social, ka kanosur ministren Donika Gërvalla dhe Vudi Xhymshitin.

Sipas Policisë së Kosovës, i dyshuari është ndaluar pasi përmes rrjeteve sociale ka kanosur dy persona. "Është arrestuar i dyshuari mashkull kosovar për shkak se përmes rrjeteve sociale ka kanosur viktimën femër kosovare dhe viktimën mashkull kosovar. Me vendim të prokurorit i dyshuari pas intervistimit është dërguar në mbajtje", thuhet në sqarimin e Policisë, e cila nuk ka publikuar identitetin e askujt.

Hetuesit e Sektorit për Hetimin e Krimeve të Rënda e kanë intervistuar 32-vjeçarin më 18 shtator, lidhur me një postim të publikuar nga profili i tij. Postimi u referohej Gërvallës dhe Xhymshitit dhe, sipas hetuesve, përmbante formulime të trajtuara si kanosëse, përfshirë referencat për "plumbin" dhe vendin "ku me rrok". Në versionin e përcjellë të tekstit thuhej se "shpiunët" e kanë të shënuar në ballë dhe se aty "e kanë edhe nifar pike, për me kallxu ku me rrok plumi".

Pas përfundimit të intervistimit, për rastin është njoftuar prokurorja kujdestare e Prokurorisë Themelore në Prishtinë, e cila ka nxjerrë aktvendimin për ndalimin e të dyshuarit për 48 orë. Rasti po hetohet për veprën penale "Kanosja", të paraparë me nenin 181 të Kodit Penal.

Deri tani nuk ka reagim publik të të dyshuarit, as të dy personave të përmendur në postim. I dyshuari, si çdo person i ndjekur penalisht, prezumohet i pafajshëm derisa fajësia të mos provohet me vendim të formës së prerë të gjykatës.