Portsmouth nën rrethim: 500 protestues me fytyra të mbuluara përplasen me policinë

Porti i Portsmouthit, në bregun anglez të Kanalit, u kthye të dielën në mbrëmje në skenë përplasjesh. Rreth 500 persona u përpoqën të marshonin drejt zonës portuale pasi mësuan se aty kishte zbarkuar një grup prej 140 migrantësh. Disa policë mbetën të lënduar, jo rëndë, dhe disa automjete të policisë u dëmtuan.

Policia lokale e Hampshire-it dhe roja kufitare, Border Force, dolën në terren të pajisura për shtypjen e trazirave, me qëllim që grupet të mos arrinin te zona ku po mbaheshin migrantët. Shumica e protestuesve kishin kapuça dhe fytyra të mbuluara, për të mos u identifikuar nga forcat e rendit. Marshimi bllokoi qarkullimin rrugor dhe krijoi vështirësi në hipjen e pasagjerëve në trageta.

Migrantët u transferuan më pas në një qendër në Dover. Një pjesë e militantëve të ekstremit të djathtë ndoqën kolonën e automjeteve të Border Force për të filmuar pamje dhe për t'i publikuar në rrjetet sociale.

Ngjarja pasoi një marshim të ngjashëm të shtunën e kaluar pikërisht në Dover, ku ndodhet një qendër e rëndësishme e pritjes së parë. Aty porti u bllokua për rreth dy orë nga disa qindra persona të veshur me të zeza dhe me fytyrat e mbuluara me maska të thurura. Kjo "uniformë" është kthyer në shenjë dalluese të këtyre aksioneve, edhe pse në Portsmouth e mbanin më pak veta. Të dyja protestat u shoqëruan me parulla kundër "small boat", varkave të vogla që sjellin migrantë të paligjshëm nga Franca drejt brigjeve angleze përmes Kanalit.

Të dyja manifestimet u organizuan dhe u drejtuan nga Daniel Thomas, i njohur si Danny Tommo, dikur shofer dhe truproje i Tommy Robinsonit, animator i grupeve të ekstremit të djathtë anglez, i dënuar më parë për vepra penale të zakonshme dhe i gjykuar për racizëm e nxitje të dhunës në shesh dhe të urrejtjes ndaj migrantëve e myslimanëve. Robinson njihet edhe për simpatitë që prej një kohe merr nga përfaqësues të qeverisë izraelite të Benjamin Netanyahut.

Gjatë muajve të fundit, Thomas dhe Robinson kanë punuar për krijimin e të ashtuquajturës Patriot Platform, që bashkon grupe lokale të ekstremit të djathtë, të vetëquajtura "patriotë" mbi bazën e armiqësisë ndaj imigracionit, kryesisht nga jugu i Anglisë, por edhe nga veriperëndimi.

Qeveria laburiste e Andy Burnhamit i dënoi ashpër protestat që degjeneruan në përplasje me policinë, duke i cilësuar "teppismo", pra huliganizëm, ndërsa siguroi mbrojtjen e "ogni protesta pacifica", çdo proteste paqësore.

Nga ana e tij, lideri i Reform UK, Nigel Farage, i njohur për qëndrimet e tij kundër imigracionit, deklaroi në një video në rrjetin X se vendi është në prag të "gravi disordini civili", trazirave të rënda civile, dhe kritikoi qeverinë. Njëkohësisht ai dënoi ata që protestojnë me fytyrë të mbuluar dhe me një uniformë paraushtarake, duke kujtuar se çdo manifestim duhet të respektojë ligjin.