Dronët rusë mbi Ukrainë, Polonia aktivizon mbrojtjen ajrore

Në orët e para të mëngjesit, telefonat e banorëve të vojvodinave Lublin dhe Karpatet e Poshtme në Poloni filluan të binin njëri pas tjetrit. Mesazhi ishte i shkurtër dhe i prerë: "KUJDES! KUJDES! KUJDES! Sulm ajror rus në territorin e Ukrainës. Situata po monitorohet. Në hapësirën e Republikës së Polonisë po operon aviacioni polak. Ndiqni komunikatat".

Pak minuta më vonë erdhi një alarm i dytë, më i ashpër, i dërguar nga Qendra Qeveritare e Sigurisë (RCB) për gjashtë njësi administrative të vojvodinës së Lublinit: rrethet Wlodawa, Leczna, Swidnik, Chelm, rrethi i Chelmit dhe Krasnystaw. Teksti i tij ishte një urdhër i drejtpërdrejtë ndaj popullsisë: "ALARM I RCB: KUJDES! KUJDES! KUJDES! RREZIK SULMI NGA AJRI. SHKONI NË NJË VEND TË SIGURT. ZBATONI URDHRAT E SHËRBIMEVE LOKALE. PRISNI KOMUNIKATA TË MËTEJSHME".

Shkak i alarmit ishte një valë sulmesh ruse mbi Ukrainë. Komanda Operative e Llojeve të Forcave të Armatosura (DORSZ) njoftoi se, "në lidhje me aktivitetin e mjeteve ajrore pa pilot me motor reaktiv të Federatës Ruse, që kryejnë goditje në territorin e Ukrainës, ka filluar operimi i aviacionit ushtarak në hapësirën ajrore polake".

Sipas komandës, në përputhje me procedurat në fuqi, janë "aktivizuar forcat dhe mjetet e nevojshme që janë në dispozicion të saj", ndërsa "sistemet tokësore të mbrojtjes ajrore dhe të zbulimit radiolokacional kanë arritur gjendjen e gatishmërisë".

Komanda polake theksoi njëkohësisht se nuk bëhet fjalë për një përgjigje ndaj një sulmi mbi territorin e vet: "këto veprime kanë karakter parandalues e janë të orientuara drejt sigurimit të hapësirës ajrore dhe mbrojtjes së saj, sidomos në zonat ngjitur me rajonet e rrezikuara".

Të dyja vojvodinat e prekura nga alarmi i parë, Lublin dhe Karpatet e Poshtme, shtrihen përgjatë kufirit lindor të Polonisë me Ukrainën, pikërisht aty ku trajektoret e dronëve rusë kalojnë më afër territorit të NATO-s. Nuk raportohet ndonjë shkelje e hapësirës ajrore polake apo pasoja në terren.