Policia shtohet rreth Qeverisë e Kuvendit, protestuesit kërkojnë ligjin për Speciale

Një numër i madh pjesëtarësh të Policisë së Kosovës janë parë duke lëvizur drejt objektit të Qeverisë, ndërsa prania policore është shtuar edhe përreth Kuvendit, në orët e fundit para skadimit të afatit për zgjedhjen e presidentit të ri të vendit.

Kur kanë mbetur më pak se katër orë deri në përfundim të këtij afati, ende nuk është paraqitur asnjë kërkesë për thirrjen e një seance të jashtëzakonshme, në të cilën pritet të votohet për kreun e shtetit.

Në shesh, protestuesit u kërkojnë deputetëve të Kuvendit që të votojnë ligjin për Gjykatën Speciale. Qytetarët e mbledhur aty kanë paralajmëruar se nuk do të rrinë duarkryq nëse ligji nuk kalon.

Numri i saktë i policëve të vendosur rreth dy institucioneve nuk është bërë i ditur.