Policia e Kosovës hedh poshtë pretendimet për ndëshkime: nuk ndalohet askush për simbolet e UÇK-së

Policia e Republikës së Kosovës ka dalë me një demant publik ndaj pretendimeve të përhapura në rrjetet sociale se qytetarët po ndalohen apo po ndëshkohen për shkak të flamujve të UÇK-së.

"Me përgjegjësi të plotë ju njoftojmë se Policia e Republikës së Kosovës nuk ka ndaluar, ndëshkuar, e as ushtruar dhunë ndaj asnjë qytetari, për shkak të simboleve historike kombëtare apo simboleve të UÇK-së, por për shkak të shkeljeve ligjore", thuhet në njoftimin e Policisë, e cila i cilëson dezinformata pretendimet e publikuara në internet.

Reagimi vjen në prag të protestës së paralajmëruar për sonte, më 20 shtator, në orën 21:00, në sheshin qendror të Prishtinës, kundër aktgjykimit të Gjykatës Speciale në Hagë. Për këtë tubim, Policia thotë se ka angazhuar kapacitetet e nevojshme njerëzore dhe logjistike, me qëllim ruajtjen e rendit dhe të qetësisë publike, garantimin e sigurisë së qytetarëve dhe menaxhimin e trafikut gjatë dhe pas protestës.

Institucioni ka rikujtuar se pas protestave të zhvilluara ditëve të fundit në kryeqytet, grupe të caktuara pjesëmarrësish, përfshirë persona me maska, kanë vazhduar të lëvizin me automjete nëpër rrugët e Prishtinës. Sipas Policisë, disa prej tyre i kanë drejtuar automjetet në mënyrë të pakontrolluar dhe të rrezikshme, ndërsa persona të tjerë kanë dalë apo kanë qëndruar nëpër dritare dhe mbi automjete, duke rrezikuar veten, këmbësorët dhe pjesëmarrësit e tjerë në trafik.

Pikërisht këtu, thotë Policia, qëndron shkaku i veprimeve të zyrtarëve policorë në terren: parandalimi i këtyre sjelljeve, e jo simbolet që qytetarët mbajnë gjatë protestave apo në automjetet e tyre. Garantimi i sigurisë së qytetarëve, mbarëvajtja e qetë e protestës, menaxhimi i trafikut dhe parandalimi i vozitjeve të rrezikshme janë përshkruar si pjesë e detyrave ligjore të saj, në interes të sigurisë së përgjithshme.

Në fund të njoftimit, Policia u ka bërë thirrje qytetarëve dhe mediave që të mbështeten në informacionet zyrtare dhe të shmangin përhapjen e pretendimeve të pakonfirmuara.