Policë të filmuar me armë me plumba gome drejt të rinjve në protestën te Kryeministria

Dy efektivë të policisë janë filmuar në Bulevardin Dëshmorët e Kombit me armë të pajisura me plumba gome në duar, të drejtuara drejtpërdrejt në shenjë kundër grupeve të të rinjve dhe protestuesve. Është momenti më kritik i një dite që ka kaluar me orë të tëra përplasjesh, gaz lotsjellës, ujë me presion, molotovë dhe shoqërime masive.

Nuk dihet ende nëse plumbat e gomës janë qëlluar realisht apo nëse ka të plagosur, ndërsa policia nuk ka dhënë asnjë deklaratë zyrtare për pamjet. Në terren mbeten qindra qytetarë, të ekspozuar ndaj rrezikut të lëndimeve fizike nga përdorimi i armëve të tilla në distancë të afërt.

Bulevardi vijon të jetë një nga pikat më të nxehta të përplasjeve, me tensione që raportohen në nivele tejet alarmante. Pamjet e efektivëve me armë në shenjë janë parë si një përshkallëzim i rrezikshëm i masave të përdorura për kontrollin e turmës.

Përballja kishte nisur të ashpërsohej më herët, kur një numër i madh protestuesish u mblodh në sheshin pranë Ministrisë së Brendshme dhe në bulevard. Turma përparoi drejt kordonëve të policisë dhe i detyroi efektivët të tërhiqen më pranë Kryeministrisë. Policia u përgjigj duke hedhur masivisht gaz lotsjellës për ta shpërndarë, por protestuesit nuk lëshuan terren: numri i tyre mbeti shumë i lartë dhe nuk pati asnjë tërheqje.

Organizatorët, arsyeja e protestës dhe numri i saktë i pjesëmarrësve nuk janë bërë ende të ditura.