Pistoletë dhe municion në banesë: arrestohet 34-vjeçari që kanosi një familje në Kurbin

Një pistoletë, dy krehra dhe municion luftarak u gjetën gjatë kontrollit të banesës së një 34-vjeçari në fshatin Adriatik të Kurbinit, i cili dyshohet se kërcënoi me armë zjarri tre anëtarë të një familjeje.

Sipas Policisë, ngjarja ndodhi mbrëmjen e 22 gushtit, rreth orës 20:00. Pas një konflikti të nisur për motive të dobëta, i dyshuari, i identifikuar me inicialet N. N. dhe banues në të njëjtin fshat, kanosi me armë 72-vjeçarin N. N. dhe djemtë e tij, M. N., 43 vjeç, dhe A. N., 50 vjeç. Gjatë përplasjes, gjithnjë sipas Policisë, ai goditi me grushte edhe 50-vjeçarin.

Sapo morën informacionin për kanosjen me armë, shërbimet e Komisariatit të Policisë Kurbin nisën kërkimet për identifikimin dhe kapjen e autorit. Operacioni, i koduar "Reagimi", përfundoi me vënien e 34-vjeçarit në pranga.

Arma e sekuestruar dyshohet se është pikërisht ajo e përdorur gjatë kanosjes. I arrestuari hetohet për veprat penale "Mbajtja pa leje dhe prodhimi i armëve, armëve shpërthyese dhe i municionit", "Kanosja" dhe "Dëmtime të tjera me dashje". Materialet procedurale i janë referuar Prokurorisë për veprime të mëtejshme, ndërsa ndaj tij vlen prezumimi i pafajësisë derisa të provohet e kundërta nga gjykata.