Pezeshkian: Është koha t'i japim fund luftës me SHBA-në, jemi në pozitë fuqie

Presidenti iranian, Masoud Pezeshkian, ka bërë thirrje për t'i dhënë fund luftës disamujore me Shtetet e Bashkuara, duke pretenduar se Irani flet nga një pozicion force. Deklarata e tij, e përcjellë nga mediat shtetërore iraniane të premten, vjen mes paralajmërimeve të ashpra ushtarake dhe pezullimit të bisedimeve nga ana amerikane.

"Është më mirë që ta përfundojmë luftën tani, pasi jemi në një pozicion pushteti dhe dinjiteti", tha Pezeshkian. Sipas versionit të cituar nga agjencia shtetërore Mizan dhe agjencia gjysmëzyrtare ISNA, ai deklaroi gjithashtu: "Do të ishte më mirë ta përfundojmë luftën sot, derisa jemi në një pozitë të fuqisë dhe dinjitetit".

Presidenti iranian pretendoi se "e gjithë bota e pranon fitoren tonë" dhe akuzoi Shtetet e Bashkuara se kanë sulmuar shkolla, spitale dhe infrastrukturën iraniane, duke shkelur, sipas tij, rregullat ndërkombëtare.

Ndonëse thirrja për paqe vjen nga kreu i shtetit, autoritetet ushtarake iraniane kanë mbajtur një ton kërcënues. Shefi i Shtabit të Forcave të Armatosura të Iranit paralajmëroi se çdo "kërcënim i ri" ndaj vendit do të merrte një përgjigje "shkatërruese", sipas agjencisë gjysmëzyrtare Mehr. Në të njëjtën linjë, pjesëtarë të Gardës Revolucionare Islamike të Iranit (IRGC) kanë paralajmëruar se, në rast të rifillimit të luftimeve, mund të përdoren armë edhe më "shkatërruese".

Zhvillimet pasojnë deklaratën e presidentit amerikan, Donald Trump, se bisedimet me Teheranin janë pezulluar.

Në planin ekonomik, Ministria e Jashtme e Iranit e ka akuzuar Uashingtonin për "terrorizëm ekonomik", pasi Shtetet e Bashkuara paralajmëruan zgjerimin e sanksioneve për të rritur presionin ndaj Teheranit. Uashingtoni u ka bërë thirrje edhe qeverive të tjera, përfshirë Kinën, që t'i bashkohen përpjekjeve për të izoluar më tej ekonominë iraniane.

Irani ka qenë prej vitesh nën sanksione të gjera perëndimore, por ka zhvilluar mekanizma për t'i anashkaluar pjesërisht ato. Teherani ka zgjeruar prodhimin vendas, ka përdorur rrjete informale të tregtisë ndërkufitare, ka siguruar mallra të kufizuara përmes vendeve të treta dhe ka shfrytëzuar një flotë në hije për transportin e naftës.