Peshq gjigantë ngordhin në Liqenin e Badovcit, ngrihen dyshime për ujin

Tre peshq të llojit ballgjër, secili me peshë të jashtëzakonshme, janë gjetur të ngordhur në Liqenin e Badovcit. Njoftimin e ka bërë Shoqata e Peshkatarëve Sportivë Rekreativë "Krapi", e cila ka nxjerrë një ekip në terren menjëherë pasi ka marrë informacionet, gjatë ditës së 19 shtatorit.

Përmasat e peshqve janë ato që e bëjnë rastin të veçantë. "Biomasa e tyre është jashtëzakonisht e madhe: dy prej tyre vlerësohen të jenë rreth 40 kg, ndërsa i treti kalon peshën prej 50 kg", thuhet në njoftimin e shoqatës.

Inspektimi nuk ka mundur të përfundojë. "Për shkak të orëve të vona dhe reshjeve të vazhdueshme të shiut gjatë mbrëmjes, puna në terren është ndërprerë përkohësisht. Inspektimi dhe verifikimi i mëtejshëm do të vazhdojë nesër për të konstatuar shkaqet e plota të kësaj ngjarjeje", ka njoftuar "Krapi".

Dyshimet e peshkatarëve nuk kanë nisur me gjetjen e trupave të peshqve. Sipas shoqatës, ballgjerët zakonisht qëndrojnë në thellësi dhe nuk frekuentojnë ujërat e cekëta, ndërsa një prej tyre ishte parë pikërisht atje pak kohë më parë: "Vetëm 3 ditë më parë, njëri nga këta peshq është incizuar i gjallë nga një peshkatar në një zonë me thellësi ujore prej vetëm rreth 1 metri".

Pas atij rasti, thotë shoqata, situata në liqen është monitoruar me kujdes, pasi dalja e peshqve në ujëra të cekëta u konsiderua sinjal se mund të kishte probleme me gjendjen e tyre shëndetësore ose me mjedisin ujor. Shkaqet e ngordhjes ende nuk janë përcaktuar.

Shoqata "Krapi" ka njoftuar se do të dalë me informacione të reja pasi të përfundojnë verifikimet në terren.