Pesë raste dhune në familje brenda 24 orëve: arrestime, Psikiatri dhe një i dyshuar në kërkim

Një i dyshuar i dërguar në Psikiatri, një tjetër i arrestuar nën ndikimin e alkoolit dhe një i tretë ende në kërkim: kjo është pamja që del nga raporti 24-orësh i Policisë së Kosovës, i cili evidenton pesë raste të dhunës në familje në Prishtinë, Klinë, Gjakovë, Vushtrri dhe Skenderaj.

Në disa prej këtyre rasteve, të dyshuarit janë arrestuar dhe me vendim të prokurorit janë dërguar në mbajtje. Por jo të gjitha kanë përfunduar njësoj.

Në Prishtinë, policia ndërhyri herët në mëngjes, më 1 tetor, rreth orës 06:15. "Është arrestuar i dyshuari mashkull kosovar pasi që i njëjti dyshohet se ka sulmuar viktimat kosovare", thuhet në raportin policor. Në vend të qelisë, i dyshuari u dërgua me vendim të prokurorit në repartin e Psikiatrisë.

Në Klinë, po atë ditë, rreth orës 20:30, një grua lajmëroi policinë se një burrë kishte ushtruar dhunë në familje ndaj saj. I dyshuari u arrestua dhe gjatë procedurave iu nënshtrua testit të alkoolit, i cili sipas policisë doli pozitiv, me 0,69 promilë. "Me urdhër të prokurorit i dyshuari dërgohet në mbajtje. Rasti po hetohet nga ekipet relevante policore", shkruan policia në raport.

Rasti i Gjakovës u bë i ditur me vonesë. Sipas policisë, ngjarja ndodhi më 30 shtator, rreth orës 21:00, ndërsa ankuesja e denoncoi të nesërmen, më 1 tetor. I dyshuari u arrestua dhe, pasi u intervistua, prokurori vendosi që ai të dërgohej në mbajtje.

Në Vushtrri, një grua njoftoi policinë se një burrë kishte ushtruar dhunë ndaj saj. Këtu rasti mori një drejtim tjetër: "Palët janë sjellë në stacion dhe pas intervistimit në konsultim me prokurorin janë liruar në procedurë të rregullt", thuhet në raportin e Policisë së Kosovës.

Më i hapuri mbetet rasti i Skenderajt, i raportuar më 24 shtator, rreth orës 16:00. Ankuesja deklaroi se i dyshuari kishte kryer veprën ndaj saj. Sipas policisë, njësiti për dhunë në familje po zhvillon hetime, ndërsa personi i dyshuar është në kërkim policor.

Sipas policisë, të pesë rastet po trajtohen nga njësitet përkatëse policore dhe nga organet e drejtësisë, në varësi të rrethanave të secilit rast.