Pesë civilë të një familje, të vrarë më 1999: gjykimi në mungesë dështon në Prishtinë

Një sallë gjyqi në Prishtinë, pesë të akuzuar që nuk gjenden në Kosovë dhe një karrige e zbrazët avokati. Kjo ishte e enjtja në Gjykatën Themelore në Prishtinë, ku dështoi të nisë gjykimi në mungesë për vrasjen e pesë civilëve, pjesëtarë të një familje, gjatë luftës në Kosovë.

Seanca u ndërpre para se të merrte hapin e parë, pasi për të akuzuarin Zoran Dzeletoviq nuk u paraqit asnjë avokat. Në mungesë të kushteve ligjore, procesi nuk mund të vazhdonte. Gjykatësi Kujtim Krasniqi tha se do të kërkojë sqarime nga Oda e Avokatëve të Kosovës për mosparaqitjen e avokatit për këtë të akuzuar.

Në bankën e të akuzuarve, formalisht, janë pesë emra: Predrag Nikoliq, Zoran Dzeletoviq, Ivan Ivanov, Sinisha Milanoviq dhe Jovica Deniq. Aktakuzën kundër tyre e ka ngritur më 1 qershor 2026 Prokuroria Speciale e Republikës së Kosovës, me propozim që gjykimi të mbahet në mungesë. Prokuroria ka theksuar se ka bërë të gjitha përpjekjet për sigurimin e të pandehurve dhe se ata nuk gjenden në territorin e Republikës së Kosovës.

Sipas aktakuzës, të pesë veprojnë si persona zyrtarë, policë në Stacionin Policor në Fushë-Kosovë, dhe krimet i kanë kryer në orar pune, gjatë ndërrimit të natës. Vepra për të cilën akuzohen është "Krime lufte kundër popullatës civile", nga neni 142 lidhur me nenin 22 të Ligjit Penal të Jugosllavisë.

Kronologjia e përshkruar në aktakuzë çon në mëngjesin e 6 majit 1999. Rreth orës 6 të mëngjesit, duke lëvizur me automjetin e punës në rrugën Prishtinë-Fushë Kosovë, të akuzuarit kishin parë viktimat F.B., M.B., L.B., M.B. dhe S.B., të gjithë civilë dhe anëtarë të një familje, duke ecur në rrugë. Nikoliq, sipas aktakuzës, i kishte thënë Dzeletoviqit të ndalte veturën me qëllim legjitimimin e tyre. Viktimave u ishin marrë dokumentet dhe ishin futur në veturën e policisë, kinse për t'u dërguar në stacionin e trenit.

Vetura nuk kishte marrë atë drejtim. Kishin vazhduar rrugën drejt Sllatinës, duke kaluar pa u ndalur nëpër pikën e kontrollit të policisë dhe ushtrisë serbe. Në vendin e quajtur "Megja" automjeti ishte ndalur, viktimat ishin urdhëruar të zbresin dhe Dzeletoviq kishte kërkuar nga Ivanov pushkën automatike. Në të njëjtën kohë, sipas aktakuzës, Nikoliq i kishte urdhëruar viktimat të shtrihen me fytyrë për tokë dhe kishte gjuajtur me pistoletë të tipit CZ99, ndërsa Dzeletoviq kishte shtënë me armën automatike Crvena Zastava.

Prokuroria pretendon se Milanoviq dhe Deniq kishin qenë të prezentë në vendngjarje, duke kontribuar dhe ndihmuar të akuzuarit e tjerë për kryerjen e vrasjeve. Më pas, thuhet në aktakuzë, të gjithë kishin vazhduar rrugën në drejtim të Lipjanit, dhe gjatë rrugës Nikoliq i kishte dhënë Ivanovit dokumentet e viktimave me udhëzimin t'i djegë. Pastaj ishin kthyer në stacionin policor në Fushë-Kosovë.