Përplasje para protestës së veteranëve në Prishtinë, suspendohet një polic

Një zyrtar i Policisë së Kosovës është suspenduar nga detyra pas përplasjes verbale që ndodhi të premten, më 18 shtator 2026, në Prishtinë, pak para se të niste protesta e thirrur nga Organizata e Veteranëve të Luftës së UÇK-së. Suspendimi është bërë me rekomandim të Drejtorisë Regjionale të Prishtinës.

Incidenti nisi si debat mes një qytetari dhe disa zyrtarëve policorë, në të cilin më pas u përfshinë edhe qytetarë të tjerë të pranishëm. Në një moment, policët iu afruan ish-deputetes Aida Dërguti dhe tentuan ta ndalonin. Sipas pretendimit të zyrtarëve policorë, Dërguti kishte kaluar rrugën duke mos respektuar rregullat e komunikacionit. Situata u shoqërua me debate mes policëve dhe qytetarëve përreth.

Protesta u mbajt po atë ditë në sheshin "Skënderbeu" në Prishtinë, si shprehje pakënaqësie me vendimin dënues të Gjykatës Speciale ndaj katër ish-krerëve të UÇK-së. Që nga 16 shtatori, kur u shpall aktgjykimi, qytetarë të shumtë po protestojnë në forma të ndryshme kundër vendimit.

Hashim Thaçi, Kadri Veseli, Jakup Krasniqi dhe Rexhep Selimi u dënuan me gjithsej 81 vjet burgim. Ish-presidenti Hashim Thaçi mori 25 vjet burgim, po aq sa edhe ish-kryeparlamentari Jakup Krasniqi. Ish-kryetari i PDK-së, Kadri Veseli, u dënua me 18 vjet, ndërsa ish-deputeti Rexhep Selimi me 13 vjet. Vendimi është i shkallës së parë dhe mund të apelohet.